“Çlirimi” i akseve kombëtare/ Korçë, nis aksioni për heqjen e objekteve pranë rrugëve

“Janë kryesisht rrethime të banesave, ka dhe tabela karburantesh, servise që mund të kenë makina të çmontuara që kanë zënë rrugën,  më pak dhe përpunim mermeri.”

Paralajmërimi për çlirimin vullnetar të hapësirave  publike  ka përfunduar  më 5 gusht  dhe inspektorët  dolën në terren për të monitoruar situatën.

“Ka filluar një lloj ndërgjegjësimi nga banorët apo bizneset për të çmontuar vullnetarisht. Ndërkohë grupet janë në terren duke marrë masa që në rast se nuk ka  nisur ende largimi  do merren masa për ti gjobitur dhe për ti  prishur nga ana e strukturave tona.”

Të enjten inspektorët u ndalën në shembjen e rrethimeve që po bëhej vullnetarisht nga bizneset  që kishin zaptuar hapësirat  që cenonin sigurinë në rrugën  nga Korça në Pogradec

Aksionet në rrugët kombëtare/ Rama: Po çlirohen nga objektet buzë tyre

Kryeministri Edi Rama ka ndarë pamje nga aksioni për çlirimin e hapësirave publike në rrugët kombëtare.

Përmes një postimi në rrjetet sociale, ku shihet se një lavazh nuk e ka respektuar distancë, Rama u shpreh se distanca duhet ruajtur sipas kritereve të programit të ri të Rilindja Urbane 2.0.

“Ka nisur edhe çlirimi i buzërrugëve kombëtare, duke përcaktuar një kufi tërheqjeje të subjekteve, të cilat njëkohësisht duhet të sigurohen se asnjë rraqe nuk do të jetë më nën qiell të hapur dhe njëkohësisht, sipas kritereve të programit të ri të Rilindja Urbane 2.0 do të kontribuojnë me një sasi gjelbërimi, bashkarisht me qeverinë, duke e trajtuar hapësirën buzë e përballë akseve kombëtare si pjesë të shtëpisë sonë të përbashkët dhe jo si tokë të askujt”, shkruan Rama.