Ministria e Infrastrukturës tregon rrugët më problematike në qarkullim/ Energjia, 42 fidera me probleme

Në aksin malor Vau i Dejës- Pukë-Fushë Arrëz-Kalimash vazhdojnë reshjet e dëborës. Në Qafë Mali trashësia e dëborës arrin deri në 50 cm. Grupet në terren po vazhdojnë pastrimin e rrugës. Rekomandohet përdorimi i gomave dimërore dhe zinxhirëve.

Në segmentin Klos-Peshkopi ka pasur reshje të dëborës shoqëruar, me erë të fortë, rekomandohet përdorimi i zinxhirëve.

Në Bajram Curri-Valbonë, Ura Bujan-Qafë Morinë(doganë), Sopot-Kerrnaj, Qafë Mejdan -Tropojë-Buçaj, B.Curri-Fierzë, B.Curri-Cerrnice, Sopot-Kam, reshjet e dëborës kanë pushuar, mjetet borëpastruese ndodhen në terren, ku po bëhet shpërndarja e kripës.

Në Rajonin Qendror, në rrugën e Dajtit ka pasur reshje dëbore me intensitet. Po krijojnë problematikë mjetet me goma verore, pasi bllokojnë rrugën duke u kthyer në pengesë edhe për borëpastrueset.

Në rajonin e Korçës ka pasur reshje dëbore në Qafë Thanë dhe Qafë Plloçë. Në aksin rrugor Podgorie-Kryqëzim Liqenas vijojnë me intensitet të ulët reshjet e dëborës. Borëpastrueset ndodhen në terren, ku po bëhet pastrimi i rrugës dhe shpërndarja e kripës.

Si pasojë e motit ka pasur probleme të furnizimit me energji në fiderat 10/6 kV që furnizojnë me energji kryesisht zona rurale të thella malore. Në rajonin e Kukësit nuk ka pasur probleme të rënda me linjat dhe furnizimin me energji.

Në orët e drekës, ka pasur problematika në rajonet e Elbasanit dhe Beratit.

Gjatë paradites Nënstacioni Radhimë është stakuar për arsye sigurie, pasi kishte nivel të lartë të ujit nga reshjet e shumta. Aktualisht ky nënstacion është rivendosur në punë dhe situata është normalizuar.

Në të gjithë vendin aktualisht janë 42 fidera me probleme. OSSH ka të angazhuar në terren 1500 punonjës me 196 mjete.

Në linjat e transmetimit nuk raportohen problematika, ndërkohë që në kaskadën e Drinit situata paraqitet me prurje normale.

Në stacionin e pompimit në Lezhë dhe Kurbin, ka pas ndërprerje të energjisë dhe po punohet për rikthimin në normalitet. Megjithatë, nuk ka ndërprerje në furnizimin me ujë. Në pjesën tjetër të vendit, situata e furnizimit me ujë dhe impiantet e trajtimit të ujërave të ndotura janë në kushte optimale.

Për shkak të kushteve meteorologjike tragetet e linjës Durrës-Bari-Durrës nuk do të operojnë, ndërkohë që ato të linjës Durrës - Ankona- Durrës do të operojnë normalisht.

Moti i keq/ Policia greke ndalon edhe kalimin e autobuzëve nga pika kufitare e Kapshticës

Policia Kufitare Greke ka njoftuar Policinë Kufitare të Korçës se nga ora 17:00 deri në një njoftim të dytë nuk do të lejohet lëvizja e mjeteve të tonazhit të rëndë, për shkak të kushteve jo të mira atmosferike.

Në vijim të njoftimit të dhënë më parë, ku Policia Kufitare Greke, ka njoftuar Policinë Kufitare të Kapshticës për bllokimin e lëvizjes së kamionëve, nga mbrëmja e sotme, përveç bllokimit të lëvizjes së mjeteve të tonazhit të rëndë (kamionë), do të ndalohet lëvizja deri në një njoftim të dytë dhe për autobuzët.

Era e fortë rrëzon pishën/ Bllokohet aksi Dukat-Llogara, përmbyten banesat

Si pasojë e erës të fortë një pishë është rrëzuar duke bllokuar aksin rrugor Dukat-Llogara. 

Gjithashtu raportohet për dy familje që kanë kërkuar ndihmë tek ish-fabrika e makaronave, pasi banesat e tyre janë përmbytur nga uji si pasojë e reshjeve të shiut.

Reshje dëbore/ Situata problematike në Qarkun e Dibrës

Situata problematike vazhdon të mbetet në Qarkun e Dibrës për shkak të reshjeve të dendura të dëborës.

Raportohet se Rruga e Arbrit është ende e bllokuar dhe raportohet se në Bypass-in e Murrizit një automjet ka dalë nga rruga dhe ka mbetur i bllokuar me tre persona brenda.

Një fadromë është nisur për të mundësuar qasje në zonën e Bypass-it. Shumë njësi administrative në Qarkun e Dibrës janë të bllokuara, përfshirë Lurën, Kalanë e Dodës, Selishtën, Ostrenin dhe Trebishtin, ku lartësia e borës ka arritur deri në 70 cm.

Në disa fshatra ka munguar energjia elektrike për më shumë se 24 orë.

Vështirësi qarkullimi në aksin Korçë-Qafë Thanë

Situatë e rënduar në juglindje, krijuar nga reshjet e dendura të borës. Sipas të dhënave dhe pamjeve të siguruara, duket se problematike mbetet aksi nacional Korccë - Pogradec dhe Pogradec - Qafë Thanë, ku duket trashësia e borës e cila në temperaturat e ulëta po ngrin dhe ka rrezik në qarkullimin e mjeteve të cilët nuk janë të pajisur me zinxhira.

Nga Autoriteti Rrugor konfirmohet se Qafë Thana mbetet aksi më problematik për shkak edhe të turistëve që vijne drejt Korçës apo largohen drejt Tiranës. Vështirësi po hasin edhe borëpastrueset në këtë zonë.

Borëpastrueset vijojnë pastrimin e rrugës, por puna e tyre bëhet e vështirë për shkak të trafikut të mjeteve që nuk kanë pajisje dimërore. Rradha e automjeteve në pritje ka arritur deri në Prrenjas sipas raportimeve të fundit.

Situata nga bora në Shkodër/ Bashkia: I pakalueshëm aksi Kir-Shosh, disa zona janë pa drita

Reshjet e dendura të dëborës, ngricat dhe temperaturat e ulëta kanë pushtuar vendin.

Bashkia e Shkodrës njofton që reshjet e borës vazhdojnë të jenë të pranishme dhe për këtë shkak aksi rrugor Kir-Shosh është i bllokuar.

Sipas njoftimit, ka pasur probleme me energjinë elektrike në Postribë, Rrethina, Gur i Zi, Velipojë, Ana e Malit.

Gjithashtu Bashkia e Shkodrës apelon qytetarët që të kenë kujdes gjatë lëvizjes me automjete dhe të shmangin udhëtimet e panevojshme.

Njoftimi:

Reshjet e borës vazhdojnë të jenë të pranishme, ndërsa në zonat malore të territorit të Bashkisë Shkodër ka pasur një ulje të ndjeshme të temperaturave.

• Aksi rrugor Bogë - Bregu i Lumit është i kalueshëm
• Aksi rrugor Kir - Shosh është i bllokuar për shkak të shembjeve të dheut dhe reshjeve të borës.

Njësitë Administrative Shalë dhe Shosh janë pa energji elektrike. Probleme me furnizimin me energji janë raportuar edhe në Nj. A. Postribë, Rrethina, Gur i Zi, Velipojë, Ana e Malit. Grupet e OSHEE-së ndodhen në terren për riparimin e defekteve të shkaktuara nga moti i keq, përfshirë reshjet e borës dhe stuhitë e erës.

 Kujdes për drejtuesit e automjeteve:
Qarkullimi në zonat malore duhet të kryhet vetëm me goma dimërore dhe zinxhirë.

Duke marrë parasysh kushtet e vështira atmosferike dhe rreziqet e mundshme, u bëjmë thirrje qytetarëve dhe udhëtarëve të kontrollojnë gjendjen e automjeteve të tyre dhe të shmangin udhëtimet e panevojshme për të minimizuar çdo rrezik që mund të sjellë moti i keq./