Aksident i trefishtë në Lushnje, një grua përfundon në spital

Sipas Klan News, në aksident u përfshinë 3 automjete, një furgon, një kamion me targa të Maqedonisë së Veriut dhe një makinë Audi.

Si pasojë e përplasjes, mbeti e plagosur një grua që ndodhej te Audi. Ajo u dërgua në spital dhe ndodhet nën kujdesin e mjekëve. Ndërkohë, në vendin e ngjarjes ndodhet policia, e cila ka nisur punën për zbardhjen e rrethanave të këtij aksidenti.

Drejtonte automjetin i droguar, arrestohet 28-vjeçari në Tiranë

Një 28-vjeçar është arrestuar në Tiranë, pasi po drejtonte mjetin nën efektin e lëndëve narkotike.

Në një njoftim për mediat, Policia e Tiranës thotë se pas testimit me aparatin AquilaScan numri i shoferëve të droguar ka shkuar në 33.

“Shkon në 33 numri i drejtuesve të mjeteve që kanë rezultuar nën efektin e drogave, pas testimit me aparatin AquilaScan. Gjatë kryerjes së veprimeve policore dhe administrative, drejtuesi i automjetit me iniciale M. M., 28 vjeç, ka manifestuar sjellje të dyshimta në raport me kërkesat ligjore të punonjësve të Policisë, dhe nga verifikimi me drogë-testues rezultoi nën efektin e lëndëve droguese THC. Sa më sipër, u bë menjëherë arrestimi në flagrancë i drejtuesit të automjetit, për veprën penale “Drejtimi i automjetit në mënyrë të parregullt”, parashikuar nga neni 291 i Kodit Penal të Republikës së Shqipërisë”, thotë policia në një njoftim për mediat.

Nikël, shoferi 23-vjeçar përplas për vdekje këmbësorin

Një aksident ka ndodhur pasditen e sotme në Nikël, ku një 23-vjeçar ka përplasur për vdekje një këmbësor.

Uniformat blu bëjnë me dije se shtetasi E. K., 23 vjeç, duke drejtuar automjetin tip “Audi”, ka aksidentuar shtetasin S. S., 77 vjeç.

Si pasojë e aksidentit i moshuari ka ndërruar jetë në vendngjarje.

“Më datë 19.11.2023, rreth orës 18:15, në Nikël, shtetasi E. K., 23 vjeç, duke drejtuar automjetin tip “Audi”, ka aksidentuar shtetasin S. S., 77 vjeç, banues në Nikël, i cili si pasojë e aksidentit ka ndërruar jetë në vendngjarje”, njofton policia.

Grupi hetimor ndodhet në vendngjarje dhe po punon për sqarimin e rrethanave të aksidentit.