Aksident i frikshëm në autostradën Rrogozhinë-Lushnjë, përplasen tre automjete

Si pasojë e përplasjes së disa automjeteve në seri, një person ka mbetur i plagosur dhe është transportuar në spitalin e Lushnjës, ku po merr ndihmën mjekësore. Sipas informacioneve paraprake, ai ka pësuar disa lëndime, por ndodhet jashtë rrezikut për jetën.

Dyshohet se shkak për aksidentin është bërë një automjet që ka humbur kontrollin dhe është përmbysur në rrugë. Për të shmangur përplasjen me të, drejtuesi i një automjeti tip Benz ka frenuar menjëherë, ndërsa automjetet e tjera që udhëtonin pas tij janë përplasur njëri pas tjetrit.

Në vendngjarje kanë mbërritur shërbimet e Policisë Rrugore, të cilat po punojnë për disiplinimin e trafikut, si dhe ekspertët që po kryejnë dokumentimin e aksidentit.

Gjithashtu, në zonë kanë ndërhyrë edhe forcat zjarrfikëse të Lushnjës për pastrimin e karrexhatës nga mbetjet e automjeteve të përfshira në përplasje.

Makina del nga rruga dhe bie në humnerë, gjendet një pistoletë pranë mjetit, ja për çfarë dyshohet

Një automjet tip “Benz” ka dalë nga rruga dhe ka rënë në një humnerë rreth 150 metra larg aksit rrugor, në fshatin Farret, në njësinë administrative Stravaj, në Librazhd.

Në timonin e automjetit, me targa AB178DV, ndodhej 22-vjeçari Renis Pajtim Kalnxhi, i cili është transportuar në Spitalin e Librazhdit. Sipas informacioneve paraprake, ai ndodhet jashtë rrezikut për jetën.

Nga këqyrja e vendit të ngjarjes nuk janë konstatuar persona të tjerë që mund të kenë qenë në automjet. Ndërkohë, pranë mjetit të dëmtuar është gjetur një armë zjarri, tip pistoletë.

Burime bëjnë me dije për A2CNN se drejtuesi i automjetit dyshohet se ishte përfshirë në një konflikt dhe ishte dëmtuar përpara se automjeti të dilte nga rruga.

Policia po vijon hetimet për të zbardhur rrethanat e ngjarjes, ndërsa veprimet e mëtejshme hetimore do të ndiqen nga Komisariati i Policisë Librazhd. 

Aksident pranë terminalit të autobusëve në Korçë, drejtuesi i një Benz-i përplas këmbësorin

Një aksident rrugor është regjistruar në afërsi të terminalit të autobusëve në qytetin e Korçës, ku drejtuesi i një automjeti tip Benz ka përplasur një këmbësor.

I dëmtuari është transportuar me urgjencë në spital, ku mësohet se ndodhet jashtë rrezikut për jetën.

Në vendngjarje ndodhet policia, e cila po kryen veprimet për zbardhjen e rrethanave të aksidentit. 

Përmbyset mjeti sportiv që po drejtonte, humb jetën 46-vjeçari në Kukës

Në livadhet e fshatit Domaj, njësia administrative Gjinaj, Has, një mjet sportiv dyshohet se është përmbysur aksidentalisht.

Si pasojë, ka humbur jetën shtetasi kosovar A. Q., 46 vjeç (drejtuesi i mjetit), ndërsa vëllai i tij, shtetasi V. Q., 38 vjeç, po merr ndihmë mjekësore në spitalin e Kukësit, shkruan A2.

Grupi hetimor po kryen veprimet për sqarimin e plotë të rrethanave të aksidentit. 

Aksident i trefishtë në aksin Gjirokastër - Tepelenë, 5 të plagosur

Një aksident rrugor është regjistruar në afërsi të kthesës së Shtëpëzit, në aksin nacional Gjirokastër - Tepelenë, ku janë përfshirë tre automjete.

Si pasojë e përplasjes së fortë, pesë persona kanë mbetur të plagosur dhe janë transportuar në urgjencën e Spitalit Rajonal “Omer Nishani” në Gjirokastër, ku po marrin ndihmën mjekësore, shkruan A2.

Shkak i aksidentit dyshohet se ishte lagështira në rrugë dhe shpejtësia.