Rëndohet bilanci/ 4 viktima dhe 2 persona të plagosur nga aksidenti në Tepelenë

Është rritur numri i viktimave që kanë humbur jetën si pasojë e aksidentit.

Sipas policisë kanë humbur jetën 4 persona ende të paidentifikuar ndërsa dy persona të tjerë janë plagosur.

“Rreth orës 19:00, në aksin rrugor Tepelenë-Memaliaj, janë përfshirë në aksident rrugor 3 automjete.  

Si pasojë e përplasjes së automjeteve kanë humbur jetën 4 shtetas ende të paidentifikuar dhe janë dëmtuar 2 shtetas të tjerë të cilët janë dërguar për ndihmë mjekësore në Spitalin Rajonal Gjirokastër.

Grupi hetimor po punon për sqarimin e rrethanave dhe shkakut  të aksidentit”, njofton policia.

Detajet/ Identifikohen viktimat dhe të plagosurit e aksidentit në Tepelenë

Rreth orës 19:00, në aksin rrugor Tepelenë-Memaliaj, automjeti tip "Benz" me drejtues shtetasin R. R., 42 vjeç, banues në Luftinjë, është përplasur me  automjeti tip "Toyota" me drejtues shtetasin L. B., 62 vjeç, banues në Memaliaj. 

Në aksident është përfshirë edhe automjeti tip "BMV" me drejtues shtetasin E. P., banues në Gjirokastër, që qarkullonte pas automjetit tip “Toyota”.

Si pasojë e përplasjes së automjeteve kanë humbur jetën shtetasit R. R. dhe L. B., si dhe 2 pasagjeret që ndodheshin në automjetin tip "Toyota", shtetaset L. B., rreth 57 vjeçe (bashkëshortja e shtetasit L. B.) dhe A. B., rreth 85 vjeçe. 

Gjithashtu janë dëmtuar shtetasit L. M. dhe J. M., të cilët po marrin ndihmë mjekësore në Spitalin Rajonal Gjirokastër.  

Shtetasi E. P. dhe 2 pasagjerët në automjetin e tij janë dëmtuar lehtë. Grupi hetimor vijon punon për sqarimin e rrethanave të aksidentit.

Bllokohet “Audi” i blinduar

Policia në Shkodër ka bllokuar automjetin tip Audi të blinduar që i përket shtetasit L.GJ.

Pas verifikimeve rezultoi se drejtuesi i automjetit, banues në fshatin Ishull, Shëngjin, Lezhë, qarkullonte i papajisur me autorizim të lëshuar nga organi kompetent.  

Drejtuesit të automjetit iu vendos masë administrative, konform Kodit Rrugor.

Gjithashtu, u zbatua masa plotësuese për bllokimin e automjetit tip “Audi” dhe do nisin procedurat e konfiskimit.