Aksident i rëndë në autostradën Lushnjë-Fier, taksia godet për vdekje 70-vjeçarin!

Një aksident i rëndë, me pasojë një të vdekur, ka ndodhur mbrëmjen e sotme (18 shkurt), në autostradën Lushnjë - Fier.

Aksidenti u shënua në fshatin Rrapëz. Viktima u identifikua si Skënder Maledhi, 70 vjeç.

Një mjet taksi ka marrë përpara të moshuarin, i cili ka gjetur vdekjen menjëhershme.

Sipas të dhënave paraprake, viktima kalonte me biçikletë nga njëra anë e autostradës në anën tjetër dhe është përplasur për vdekje nga mjeti tip 'Hyundai”, që ishte dhe taksi.

Policia e qarkullimit ka shkuar në vendngjarje për të disiplinuar trafikun dhe për të kryer procedurat hetimore.

Në vendngjarje është thirrur dhe policia e rendit për të qetësuar situatën pasi të afërmit e viktimës kanë qenë shumë të ngarkuar emocionalisht dhe kanë fyer dhe ofenduar drejtuesin e mjetit.

Drejtuesi i taksisë që shkaktoi aksidentin është ndaluar dhe është dërguar në Policinë e Lushnjës.

Kurse ambulanca e spitalit mbërriti në pritje të veprimeve për të transportuar viktimën në morg.

Mësohet se viktima, po tentonte të kalonte autostradën nga ana tjetër, por rrethanat dhe dinamika mbeten ende të paqarta.