Reshjet e dendura, ARRSH njofton situatën për të gjithë territorin

Sipas njoftimit të ARrSh, ka pasur reshje në të gjithë territorin verior, po pa shkaktuar probleme në qarkullim dhe të gjithë specialistët dhe kontraktorët janë në terren në gatishmëri për çdo situatë.

ARrSh njofton se në zonën e Dajtit ka patur rënie gurësh dhe dherash, ashtu si dhe në zonën e Belshit. Ndërkaq është normalizuar qarkullimi në zonën e Ibës, Bubqit dhe Kamzës.

"Në segmentet e zonës së Dajtit nga reshjet ka rënie gurësh e dherash është punuar për pastrimin e tyre. Rrugët dytësore dhe segmentet e Kamzës kanë pasur disa vështirësi në qarkullim (te nënkalimi i City Park). Tani situata është e normalizuar. Grupet e punës janë përqendruar në Bubq – Ishem. Në zonën e Ibës ka pasur rënie të dendura shiu kontraktori ka punuar për stabilizimin e situatës. Në segmentet rrugore të zonës se Belshit, si rezultat i shirave të dendur në disa vende ka rënie gurësh. Kontraktori po punon për pastrimin e plotë të rrugës. Në të gjitha akset e këtij rajoni qarkullimi kryhet normalisht" njofton ARrSH.

Situata jug situate raportohet gjithashtu e normalizuar pas rrëshqitjeve të dherave në Dragot.

"Ka pasur reshje të shumta sidomos në qarkun e Gjirokastrës. Në Dragot dhe pranë Ujit të ftohtë ka pasur vërshim ujërash dhe dherash, kompania e mirëmbajtjes ka punuar gjatë natës duke kthyer qarkullimin normal. Aktualisht në Rajonin Jugor të gjitha akset janë me qarkullim normal. Kontraktorët janë në gatishmëri për çdo situatë të përkeqësuar të motit. I bëjmë apel të gjithë drejtuesve të mjeteve të bëjnë kujdes, të ulin shpejtësinë të respektojnë sinjalistikën dhe udhëzimet e policisë rrugore" shkruhet në njofimin e ARrSh.

Rrëshqitje gurësh nga reshjet në aksin Burrel-Milot

Reshjet e dendura të shiut kanë shkaktuar rrëshqitje gurësh duke rrezikuar jetët e personave dhe bllokimin e akseve rrugore.

Rrëshqitje gurësh ka patur në rrugën Burrel-Milot. Fatmirësisht nuk ka patur të lënduar por qarkullimi në këtë aks është vështirësuar duke bërë që automjetet të qarkullojnë vetëm në një sens.

Rrëshqitje gurësh ka patur gjithashtu edhe pranë tunelit të Shkopetit.

Shirat e dendur që kanë filluar mbrëmjen e së hënës dhe kanë vazhduar përgjatë gjithë natës kanë përmbytur disa qytete, ndër të cilat më të rrezikuara paraqiten Lezha dhe Kruja.

Reshjet e dendura, rrugë të bllokuara dhe përmbytje në gjithë Shqipërinë

Reshjet e dendura të shiut kanë sjellë probleme në të gjithë territorin e Shqipërisë duke bllokuar rrugë dhe përmbytur banesa.

Aktualisht aksi Balldre-Torovicë është bllokuar nga rrëshqitja e gurëve. E njëjta problematikë shfaqet edhe në aksin Rrëshen-Bukmirë ku rrëshqitja e dherave dhe gurëve e ka bërë të pakalueshëm.

Në autostradën Tiranë-Durrës është përmbytur segmenti nga Vora në Maminas duke bllokuar qarkullimin në këtë pjesë dhe për pasojë të gjitha automjetet janë të detyruar që të qarkullojnë nga rruga e vjetër.

Në jug është bllokuar si pasojë e vërshimit të inerteve rruga Tepelene-Kurvelesh, duke lënë kështu rreth 2000 banorë të zonës të izoluar.

Qyteti i Laçit ka problematika të shumta pasi shirat e dendur kanë bërë që sipërfaqe të mëdha të mbulohen nga balta. Problematike situata paraqitet edhe në Kurbin ku 350 hektarë tokë kanë përfunduar nën ujë.

Probleme të mëdha nga shirat janë shfaqur edhe tek Ura e Shkozës, ku Lana dhe ujërat e zeza kanë përmbytur disa shtëpi.