Qeveria nuk tërhiqet, ARRSH: Projekti i Unazës së Re, i ligjshëm

Në një dalje për mediat, Qendro hodhi poshtë akuzat e opozitës e cila pretendon se projekti për Unazën e Madhe është i jashtëligjshëm.

"U bëj thirrje banorëve të dorëzojnë të gjithë dokumentet që të nxjerrim VKM për të bërë të mundur shpronësimin. Ata që janë me legalizim, të bashkëpunojnë me ALUIZNI-n dhe me Bashkinë e Tiranës.

Meqë kemi pasur disa akuza nga eksponentë të opozitës dhe jo vetëm, dua të shpjegoj disa gjëra.

Dua të shpjegoj se projekti i segmentit të Unazës i ka ndjekur të gjitha hapat ligjorë të duhur. Kemi një kërkesë zyrtare nga bashkia, nga ana tjetër miratimin e fondit nga Ministria e Transportit,  më pas urdhrin e drejtorit të ARRSH dhe më pas Këshillin Teknik", tha Qendro.

Ai nënvizoi se për projektin janë ndjekur të gjitha procedurat, ndërsa sqaroi të gjitha hapat dhe vendimet që u morën, para se të niste shembja e objekteve në këtë zonë.

Nga ana e tyre, banorët nuk pranojnë asnjë kompromis që nuk lidhet me dëmshpërblim sipas vlerës së tregut për objektet që preken nga ky projekt.