Radhët në Qafë-Thanë, kryebashkiaku i Pogradecit apel qeverisë për situatën

Edhe pse gati një vit më parë u vendos një ndalesë e përbashkët mes policive kufitare shqiptare dhe maqedonase për të lehtësuar procedurat në kufi, në fakt ka rezultuar e kundërta, shkruan A2 CNN.

“Prej një ore në një ditë të zakonshme, radha do të bëhet deri në tri orë gjithsej”, thotë një turist. “Edi Rama duhet të tregojë diçka, po ashtu edhe këta të Maqedonisë”.

Dhe për këtë arsye, kryebashkiaku i Pogradecit i apelon policisë dhe qeverisë që të ndërhyjnë sa më shpejt për të normalizuar situatën problematike.

“Mendoj që më e rëndësishme është ajo që i kërkova policisë, por që i kërkoj vazhdimisht edhe qeverisë, sidomos për vështirësitë që hasin qytetarët në pikën e Qafë-Thanës. Pasi sistemi i ri që u vendos, i cili ka gati një vit, në vend që të lehtësonte qarkullimin e lirë të qytetarëve, në fakt ka sjellë të kundërtën”, thotë Ilir Xhakolli për A2 CNN.

“Lëvizja është bërë akoma më e vështirë. Besoj që morëm premtimin se do të sistemohet shumë shpejt, sepse sot, që ende nuk ka filluar mirë sezoni turistik, atje kemi një radhë të gjatë. Jo më kur të fillojë sezoni turistik! Kështu që besoj se do të dëgjohet kërkesa e qytetarëve të Pogradecit, por edhe më gjerë, me qëllim që të mos kenë probleme në lëvizjen e tyre të lirë nëpërmjet doganës”.

Në prag të çeljes zyrtare të sezonit turistik në Pogradec, rezervimet flasin për një fluks akoma më të lartë pushuesish që pritet të vizitojnë qytetin liqenor. 

Aksident tragjik në Elbasan, makina përplas për vdekje 7-vjeçarin në afërsi të shkollës

Vetëm tre javë pas aksidentit tragjik në Durrës, ku një drejtues mjeti në gjendje të dehur përplasi për vdekje dy fëmijë, një tjetër aksident i rëndë me pasoja fatale ka tronditur vendin. Këtë herë, viktimë ka mbetur një i mitur.

Rreth orës 08:00 të mëngjesit të kësaj të hëne, në aksin rrugor “Elbasan – Librazhd”, në fshatin Mengël, automjeti që drejtohej nga regjisori Petri Bozo përplasi një 7-vjeçar, i cili si pasojë humbi jetën.

Ngjarja ndodhi pranë shkollës 9-vjeçare “Sulejman Rranci”, e vendosur buzë aksit nacional “Elbasan – Librazhd”. I mituri kishte shoqëruar motrën në shkollë së bashku me nënën e tyre, ndërsa vetë zhvillonte mësimin pasdite në të njëjtën shkollë.

Dinamika dhe rrethanat e aksidentit mbeten ende të paqarta, ndërsa policia nuk ka dhënë ende një version zyrtar të ngjarjes. Sipas dëshmitarëve në vendngjarje, pasi kishin lënë vajzën në shkollë, nëna dhe djali po drejtoheshin drejt një dyqani pranë saj. Në ato momente, dyshohet se 7-vjeçari i është shkëputur nga dora së ëmës dhe është përplasur nga automjeti që drejtohej nga regjisori Bozo.

Banorët e zonës shprehen të tronditur nga ngjarja. Pas aksidentit, policia shoqëroi në komisariat regjisorin Petri Bozo i cili ka deklaruar se nuk ka qenë me shpejtësi, ndërsa grupi hetimor vijon punën për zbardhjen e plotë të rrethanave të ngjarjes.