Atentat në Urën e Mifolit, i riu u shpëton 25 plumbave

Ngjarja ndodhi mbrëmjen e së dielës në Urën e Mifolit, në Novoselë, ku ndaj makinës tip "Golf" u derdhën 25 plumba, gëzhojat e së cilave u gjetën në vendngjarje. Pre e atentatit ishte Romario Alliaj, i njohur për policinë e qytetit edhe më parë. Ai po udhëtonte i vetëm drejt Fierit, kur nga një makinë tjetër i zbrazën një karikator. Alliaj ka humbur kontrollin e makinës dhe ka përfunduar në kanal, por fatmirësisht ai i shpëtoi atentatit. Policia është në proces për gjetjen e autorëve, ndërsa është e mbyllur për detaje, me qëllim mosprishjen e hetimeve.
E shkuara

Për Romario Alliajn ka pasur një vendim nr.288, datë 30.07.2017 të Gjykatës së Shkallës së Parë Vlorë, e cila e ka dënuar me 8 (tetë) muaj burgim për veprën penale "Mashtrimi", parashikuar nga neni 143/1 i Kodit Penal. Pas këtij vendimi, ai u arrestua nga Policia e Vlorës për "Mashtrim". Seksioni i Krimeve pranë Komisariatit të Policisë Vlorë bëri të mundur kapjen dhe ndalimin e tij, pasi kishte një kallëzim për të, të bërë nga shtetasi K.K., më datë 27.07.2017. Romario Alliaj mësohet se i ka marrë një shumë parash prej 1500 euro K.K. në këmbim të një automjeti, por si përfundim shtetasi K.K. nuk ka marrë as mjetin dhe as paratë. Gjithashtu, shtetasi Romario Alliaj ka qenë i arrestuar më parë nga policia për veprën penale "Prodhimi dhe shitja e narkotikëve".