Megjithëse në Veri e Jug reshjet kanë shkaktuar probleme duke bllokuar rrugë e fshatra, durrsakët po i gëzohen këtij fenomeni dhe shpresojnë që bora të ketë ngjitur deri nesër. Emergjencat Civile më herët paralajmëruan se temperaturat do të shkojnë deri në -20 gradë, ndërsa reshjet e dëborës do të zbresin deri në lartësinë 200 metra dhe mundet të prekin edhe zonën bregdet.
Drejtori i Emergjencave Civile, Shemsi Prençi deklaroi sot se aktualisht 1/3 e vendit është e zbardhur. Ai bëri me dije se situata në vend po monitorohet, ndërsa nuk ka raste të rënda dhe se akset në gjithë vendin janë të kalueshme me zinxhirë.
Prençi paralajmëroi se, "në tre ditët e ardhshme do të ketë ulje të temperaturave deri në – 20 gradë, ku edhe Shqipëria e mesme do të ketë ngrica", raportojnë mediat në Shqipëri.
Bora bllokon verilindjen, Policia: Mos udhëtoni natën
Rruga e Kombit, mbetet segmenti problematik për udhëtimin me automjete, për shkak se reshjet e borës janë shtuar gjatë mbrëmjes së të enjtes. Pjesa më problematike është pas tunelit të Thirrës, ku bora po arrin në 60 cm trashësi.
Ministri i Transporteve Sokol Dervishi bëri me dije se nëse situata mbetet e njëjtë qarkullimi në këtë rrugë do të pezullohet.
Ndërkohë moti i keq ka shkaktuar probleme në rrugët e zonave të tjera veriore të vendit. Disa lagje ne qytetet e Kukësit dhe të Lezhës kane mbetur pa energji elektrike si pasojë e dëmtimeve në rrjet.
Ndërkohë që një punonjës i OSHEE ngriu në një nga shtyllat e tensionit të lartë ne Kukës si pasojë e ngricës. Ai u dërgua në spital ku është jashtë rrezikut për jetën. Në Kukës trashësia e borës shkon deri në 30 centimetra.
Ne Dibër pothuajse të gjitha rrugët rurale janë bërë të pakalueshme. Gjatë orëve të pasdites bora nisi me intensitet të lartë në formë stuhie.
Janë kontaktuar dhe janë kontrolluar me përgjegjësi mjetet që janë të disponueshme për të hapur rrugët, si borëpastruesja edhe kripa. I bëj thirrje gjithë komitetit të qarkut Dibër. Të gjithë drejtuesit e mjeteve janë të detyruar të vendosin gomat dimërore dhe në veçanti zinxhirët. Gjithashtu u bëj thirrjeve që të mos udhëtojnë natën pa e pasur të nevojshme, pasi edhe borëpastrueset punojnë më lehtësisht", tha Robert Ibrahimi, shef i qarkullimit rrugor Dibër.
Situata paraqitet problematike edhe në Bulqize, ku temperaturat kanë shkuar në -10 gradë.
Në shumë nga segmentet rrugore ka vështirësi në kalim për shkak të ngricave të forta dhe shumë komuna janë izoluar. Pjesa më e madhe e rrugëve rurale në Bulqizë mbeten të bllokuara.
Gjatë mbrëmjes Ministria e Brendshme njoftoi se kanë filluar problematika për shkak të motit të keq edhe në rajonet e Korçës dhe të Vlorës. Në Qafë Thanë ndalohet lëvizja e mjeteve pa zinxhirë.
Në juglindje trashësia e borës shkon 10 cm, ndërsa në zonat malore edhe më shumë, por shtabi i emergjencave deri më tani nuk ka njoftuar për raste emergjente shëndetësore në popullatë.
Ndërkohë që Dëbora ka rënë edhe në kryeqytet dhe në qytetin bregdetar të Durrësit reshjet e borës rikthehen pas shumë vitesh.
