Aksidentet rrugore, në 5 muaj regjistrohen 427, më të ndërgjegjësuar këmbësorët

Të dhënat zyrtare për aksidentet nga Instituti i Statistikave tregojnë se në pesërmujorin e parë të vitit 2023, numërohen 427 aksidente rrugore nga 483 aksidente, të ndodhura në të njëjtën periudhë të një viti më parë. Numri i aksidenteve rrugore është ulur me 11,6 %.

Numri i të aksidentuarve është 590 persona nga 680 persona të aksidentuar në pesëmujorin e parë të vitit 2022.

Më të ndërgjegjësuar në rrugë kanë rezultuar këmbësorët ku aksidentet si rezultat i sjelljes së tyre kanë shënuar ulje.

“Aksidentet rrugore, në 14,5% të rasteve, në pesëmujorin e parë të vitit 2023 kanë ndodhur si pasojë e sjelljes së këmbësorit. Numri i aksidenteve sipas sjelljes së këmbësorit për periudhën pesërmujore është ulur me 3,1%” thuhet në publikim.

Ndërkohë vetëm në muajin maj 2023 numërohen 95 aksidente rrugore nga 106 të ndodhura në muajin Maj 2022.

“Numri i aksidenteve rrugore është ulur me 10,4%. Numri i të aksidentuarve (të vrarë dhe të plagosur) rezulton 136 persona nga 156 në muajin Maj 2022. Aksidentet rrugore, në 97,9% të rasteve, kanë ndodhur si pasojë e sjelljes së drejtuesit të mjetit.

Numri më i lartë i aksidenteve në këtë periudhë është kryer nga grup-mosha 45-59 vjeç, duke zënë 25,3% të numrit të aksidenteve gjithsej. Aksidentet në këtë grup-moshë janë rritur me 50,0%, krahasuar me të njëjtën periudhë të një viti më parë.

Në muajin maj 2023, numri më i lartë i aksidenteve rrugore ka ndodhur ditën e Mërkurë me 21,1%, ndërsa numri më i ulët i aksidenteve ka ndodhur të ditën e Hënë me 7,4%. Në muajin Maj 2023, 23,2% e aksidenteve rrugore kanë ndodhur gjatë harkut kohor 14:00-17:00” vlerëson INSTAT. MONITOR

Aksidenti i trefishtë te rrethrrotullimi i TEG-ut, ndërron jetë në spital 40-vjeçari që mbeti i plagosur

Tre makina janë përfshirë në aksident pasditen e sotme në rrethrrotullimin e TEG-ut.

Policia bën me dije se në aksident janë përfshirë automjetet me drejtues shtetasit D. B., 40 vjeç, E. Sh., 23 vjeç, dhe F. H., 30 vjeç.

Si pasojë e përplasjes është dëmtuar shtetasi D. B., i cili ndërroi jetë në spital. Grupi hetimor po punon për sqarimin e rrethanave të aksidentit.

Shoferi 18-vjeçar ‘fluturon’ me makinë të moshuarin në vijat e bardha në Berat, niset me urgjencë drejt Traumës

Një aksident i rëndë ka ndodhur pak minuta më parë në qendër të qytetit të Beratit, disa metra larg Drejtorisë Vendore të Policisë Berat. Lajmi konfirmohet për BalkanWeb.

Një 70-vjeçar, që po qarkullonte me biçikletë në vijat e bardha, është përplasur dhe hedhur në ajër nga një automjet tip Benz Mercedes me targa AB 586 BD, që drejtohej nga një 18-vjeçar.

Pas përplasjes, i moshuari Muharrem Kadëna, 70-vjeç, ka rënë pa ndjenja në rrugë dhe është transportuar me ambulancë drejt Spitalit Rajonal Berat.

Burime spitalore bëjnë me dije se,i plagosuri është transportuar me urgjencë drejt Spitalit të Traumës në Tiranë, pasi gjendja e tij është kritike pasi ka pësuar hemorragji të brendshme. Në vendngjarje kanë shkuar forca të shumta policie, që po kryejnë veprimet në vendngjarje, ndërkohë që është shoqëruar në polici drejtuesi i mjetit.