Aksident në Lezhë-Shkodër/ Makina përplaset me trajlerin me targa serbe, një viktimë dhe 4 të plagosur

Një autoveturë është përplasur me një trailer me targa serbe dhe më pas ka përfunduar jashtë rruge, duke u rrëzuar në një kanal. Si pasojë e përplasjes, një grua e moshuar që udhëtonte si pasagjere në autoveturë ka humbur jetën në vend, ndërsa tre pasagjerë të tjerë, mes tyre edhe një fëmijë, si dhe drejtuesi i mjetit, kanë mbetur të plagosur.

Të lënduarit janë transportuar me urgjencë drejt Spitalit të Traumës në Tiranë, ku po marrin ndihmën e nevojshme mjekësore.

Në vendin e ngjarjes kanë mbërritur menjëherë forcat e policisë rrugore, të cilat kanë nisur hetimet për zbardhjen e plotë të rrethanave të aksidentit. Sipas të dhënave paraprake, dyshohet se shkak për aksidentin është bërë një parakalim i gabuar nga ana e trailerit me targa serbe, duke shkaktuar përplasjen fatale.

Grupi hetimor po punon për të përcaktuar përgjegjësitë dhe për të zbardhur dinamikën e plotë të ngjarjes.

Automjeti gjendet i përmbysur në oborrin e një banese/ Humb jetën gruaja në Dibër

Një aksident me pasojë vdekje ka ndodhur mesditën e sotme në orën 15:00 tek Ura e Luznis në fshatin Hotesht të Dibrës.

Një automjet është gjetur i përmbysur në oborrin e një banese. Gazetarja e ABC News, Xhoana Çallaku raporton se si pasojë e aksidentit kanë mbetur të plagosur çifti Hajri Çera dhe Arta Çera.

Kjo e fundit është dërguar në gjendje të rëndë me helikopter për në spitalin e Traumës, por ka ndërruar jetë gjatë rrugës, si pasojë e plagëve të marra.

Aksident në Bulqizë/ Dy viktima dhe një i plagosur, i mituri transportohet te Trauma

Një aksident ka ndodhur në Bulqizë. Mësohet se dy persona kanë humbur jetën.

Viktimë mësohet se kanë mbetur Desta Gjeta dhe Burhan Gjoka.

Ndërsa një i mitur është plagosur dhe është nisur te Trauma.