Aksident në aksin Lezhë-Shëngjin, raportohet për katër të plagosur

Të plagosurit janë transportuar me urgjencë drejt spitalit rajonal të Lezhës për ndihmë mjekësore.

Një mjet Mitsubishi në tentativë për të dalë nga rruga dytësore është përplasur me një mjet tjetër. Një prej shkaqeve kryesore të kësaj përplasjeje ka qenë shpejtësia. Në këtë segment rrugor, u kërkuan masa shtesë edhe pas një aksident të ndodhur pak kohë më parë ku humbën jetën dy persona.

Ndërkohë, trafiku në këtë segment është rënduar për disa minuta, ndërsa forcat e rendit kanë ndërhyrë për të normalizuar qarkullimin.

Aksident në Elbasan/ Makina përplaset me mjetin e tonazhit të rëndë, dy të plagosur

Një aksident ka ndodhur afër mesnatës në aksin rrugor Elbasan-Rrethrrotullimi i Bradasheshit.

Një autoveturë e cila dyshohet se po qarkullonte me shpejtësi tej normave të lejuara është përplasur me një automjet të tonazhit të rëndë. Autovetura në tentativë parakalimi ka humbur drejtimin e lëvizjes dhe ka goditur fuqishëm nga pas automjetin tjetër që ishte gjithashtu në lëvizje.

Për pasojë, autovetura është shkatërruar pothuajse plotësisht dhe gomat e para nga goditja me automjetin tjetër kanë “fluturuar” disa metra larg.

Paraprakisht konfirmohet se drejtuesi i autoveturës dhe një person tjetër janë transportuar për në Spitalin Rajonal të Elbasanit, ndërsa policia ka dokumentuar provat në vendin e aksidentit për të përcaktuar shkaktarin e ngjarjes që ndodhi në fshatin Katund i Ri në Njësinë Administrative Bradashesh.