Aksidenti me 3 viktima në Manzë, momenti fatal i përplasjes së automjetit

ABC News ka siguruar pamje nga aksidenti, kur shihet momenti kur automjeti përplaset me bordurën anësore të rrugës.

Pas analizimit të vendngjarjes, ekspertët kanë dalë në konkluzionin se drejtuesi i automjetit, i cili ka qenë i alkoolizuar, ka humbur kontrollin në kthesë.

Kleo Vrioni, me origjinë nga Durrësi, dhe Sara Brugentelli, shtetase italiane, kurorëzuan martesën tre ditë më parë. Së bashku me tre persona të tjerë, ata kishin dalë për të festuar dhe po udhëtonin drejt fshatit Katund i Ri, përmes rrugës dytësore të Manzës.

Bashkë me ta humbi jetën edhe 15-vjeçari Alvi Muhaxhiri. Ndërsa dy personat e tjerë të plagosur, të moshave 16 dhe 25 vjeç, po marrin mjekim në Spitalin e Traumës.

Aksidenti tragjik në Durrës, çifti që humbi jetën ishte martuar pak ditë më parë

Të tjera detaje janë zbardhur nga aksidenti tragjik i ndodhur gjatë orëve të para të mëngjesit në rrugën dytësore në Manzë, ku humbën jetën tre persona dhe dy të tjerë mbetën të plagosur.

Drejtuesi i automjetit, Kleo Vrioni dhe italiania Sara Brugentelli kishin kurorëzuar dashurinë e tyre në martesë, të dielën që shkoi.

Mbrëmjen e kaluar, çifti, së bashku me tre personat e tjerë që ndodheshin në makinë, kishin qenë në një lokal nate në zonën e Maminasit. Pas largimit nga lokali, ata janë nisur në drejtim të banesës së tyre në Katund të Ri.

Pak më vonë, në rrugën dytësore në Manzë, automjeti ka dalë nga kontrolli dhe është përplasur me një bordurë betoni. Përplasja rezultoi fatale për drejtuesin e mjetit, Kleo Vrionin, si dhe dy pasagjerë të tjerë.

Dy personat e tjerë kanë mbetur të plagosur, ndërsa 16-vjeçari ndodhet në gjendje të rëndë shëndetësore. Grupi hetimor vijon punën për zbardhjen e plotë të shkaqeve dhe rrethanave të aksidentit tragjik.