Shtohen dyshimet për mercedesin e përmbysur, pronar vëllai i deputetes

Ai ka ndërruar mbiemrin për shkak të precedentëve penal të mëparshëm.

Makina e tij tip 'Mercedes G-Class' u gjet e përmbysur mbrëmë rreth orës 22:00 pranë sheshit "Shqiponja". Në momentin që mbërriti policia Dergjini nuk ndodhej në vendngjarje.

Sipas dëshmisë së tij ai kishte dalë nga mjeti dhe kishte marrë një taksi për të shkuar në një spital privat.

"Kam qenë duke ecur me makinë me shpejtësi. Vura re që kisha një automjet pas, por nuk e di nëse po më ndiqte. Ajo makinë më goditi nga pas. Humba kontrollin dhe u përplasa me një bordurë dhe makina ime u batua në rrugë. Nuk e pashë mjetin që më goditi. Pas aksidentit nuk kisha shumë plagë në trup, jam larguar në këmbë për pak metra dhe pastaj mora taksi dhe erdha në spital. Makinën e kam marrë nga jashtë, ka pak kohë që e kamë marrë dhe prisja të bëja dokumentet" ka thënë Eldin Dergjini.

Megjithatë dëshmia e 34-vjeçarit është dukur e dyshimtë për policinë e cila dyshon se mund të kemi të bëjmë me një atentat. Nga ekspertiza e makinës policia ka konfirmuar se automjeti është goditur nga pas. Por dyshimet që rrethojnë ngjarjen kanë të bëjnë me një sërë faktorësh.

Makina të cilën Dergjini pretendon se do e pajiste me dokumente për pak ditë nuk rezulton e regjistruar në sistemin doganor, duke përforcuar dyshimet se mjeti është i trafikuar, ndërsa targat ruse mendohet të jenë e falsifikuar. Ende nuk është gjetur taksisti i cili ka transportuar në spital 34-vjeçarin dhe as makina që e ka goditur.

Eldin Dergjini është arrestuar në Tiranë në vitin 2014 dhe më pas gjykata ka caktuar masën e sigurisë "Arrest me burg", për veprën penale "Kundërshtim i punonjësit të rendit publik". Ai rezulton gjithashtu i dënuar para një viti në Trieste të Italisë për trafik droge. Në gushtin e kësaj vere Dergjini është arrestuar në Himarë për shkak se ishte kapur me armë mbajtje pa leje. Por edhe në këtë rast ai është lënë i lirë në rrethana të dyshimta.