Reshjet e shiut në Dibër, probleme me qarkullimin në rrugën e Arbrit

Një rrëshqitje që ka vijuar nga nata e mbrëmshme ka penguar qarkullimin në Rrugën e Arbrit. Rrëshqitja ka ndodhur në afërsi të fshatit Shkallë në Njësinë Administrative Xibër.

Si pasojë e ngopjes me ujë një sipërfaqe e konsiderueshme e një shpati mali ka rrëshkitur duke penguar njërën korsi të Rrugës së Arbrit. Mjetet po punojnë për ta pastruar por është e pamundur mbajtja e saj pasi vijon rrëshqitja e baltës. Qarkullimi ka vijuar, në një sens në këtë segment.

Reshjet e shiut/ Rrugët janë të qarkullueshme, probleme me energjinë elektrike në disa fshatra në Kukës e Tropojë

Qarku i Kukësit është përfshirë nga reshje shiu me intensitet të lartë, sidomos në territorin e bashkisë së Tropojës, ku ka pasur shtrëngata dhe erë të fortë. Rrugët nacionale janë të qarkullueshme normalisht pavarësisht disa problematikave nga rëniet e gurëve, dherave si dhe daljes së ujërave në rrugë.

Problemet më të theksuara kanë qenë në akset Kukës Shishtavec, B.Curri-Valbonë, Dushaj- Lekbibaj dhe Sopot-Kam Tropojë. Subjektet kontraktore kanë vazhduar punën gjatë gjithë kohës për pastrimin dhe mbajtjen funksionale të tyre. Nga bashkitë Kukës, dhe Has nuk ka raportime për ndonjë problematikë.

Ndërsa në bashkinë Tropojë, ka pasur prurje të mëdha të përrenjëve dhe lumenjve të cilat kanë vërshuar në rrugë, objekte dhe tokave bujqësore. Probleme të mëdha janë konstatuar në Njësinë Administrative Njësinë Administrative. Në fshatin Zherkë probleme janë konstatuar edhe tek rezevuari.

Furnizimi me energji elektrike është normal në gjithë territorin e Qarkut Kukës, përveç fshatrave Mgull, Vrish, Gdheshtë, Pistë, Mamëz, Llugaj, Cërnicë, Gri, Çorraj, Berishë, Vlad Pac e Zherkë.

Furnizimi me ujë të pijshëm është normal.

Moti i keq, rënia masive e gurëve bllokon aksin rrugor Kukës-Shishtavec

Reshjet e dendura të shiut pas mesnate sollën problematika në disa aksesh rrugore në Kukës. Rënie masive inertesh pati në segmentin rrugor Kukës-Shishtavec në afërsi të fshatit Nimçe.

Rruga u bllokua për disa orë por fatmirësisht në momentin e shkarjes nuk pati qarkullim automjetesh. Kompania kontraktore punoi për tre orë për largimin e gurëve dhe pastrimin e rrugës.

Aktualisht rruga është e qarkullueshme.

Reshjet e shiut shkaktojnë probleme në aksin Librazhd-Elbasan, rrëshqitje dheu e gurësh në Murrash

Reshjet e shumta të shiut gjatë orëve të fundit kanë shkaktuar probleme në aksin rrugor Librazhd-Elbasan. Rrëshqitje masive të dheut dhe gurëve ka pasur në Murrash gjatë natës rreth orës 02:00.

Mësohet se nga shembja e shumtë e gurëve është këputur rrjeta mbajtëse. Po punohet për hapjen e rrugës. Policia ka qenë gjatë natës për të mundësuar dhe mbajtur të hapur aksin rrugor.