Me një kosto prej 4.6 milionë eurosh, Këlliçi shpjegon nënkalimin në sheshin “Skënderbej”

Kjo ide e prezantuar këtë pasdite, ka për qëllim lehtësimin e trafikut në qytet, me një kosto afërsisht prej 4.6 milionë eurosh dhe një rampë hyrëse dhe dalëse prej 210 metër.

Ndër të tjera Këlliçi nuk e kurseu ironinë me rivalin politik Veliaj, ndërsa tha: “Arsyeja pse shkon vetëm 4.6 milionë është e thjeshtë, sepse nuk do vidhet”.

Pjesë nga diskutimi në studio

Belind Këlliçi: Ne nuk do ta prekim sheshin sepse kam parë lajme që “Belo çan sheshin”. Belindi nuk do ta dëmtojë asnjë centimetër sheshin. Edhe në logjikën e trafikut ajo është zemra e Tiranës ku vjen e bllokon me radhë të gjithë Tiranën. Sheshi lart nuk do të preket. Parkingu nëntokësor në shesh nuk do të preket. Nuk dëmtohet.

Në studio është i pranishëm dhe urbanisti, Gent Kaprata i cili së bashku me një grup pune prej 7-10 vetësh e kanë ideuar projektin e nënkalimit tek Sheshi Skëndërbej.

Belind Këlliçi: Gent Kaprata është një nga urbanistët më të mëdhenj në vend dhe e ka bërë në bashkëpunim me inxhinierët.

Gent Kaprata: Kemi punuar së bashku me një grup pune prej disa vetash, është një koncept-ide. Këtë e ka bërë një grup pune prej 7-10 vetash. Çdo pikë që shikoni është një pikë në territor. Nuk prek infrastrukturën e sheshit, nuk janë tubacionet aty. Ka mundësi që tek kjo linjë të mos dalë më ai uji me presion. Do të gërmohet në kohën që do të punohet. Ky është grafiku i punës, kushton 4 milionë e 500 e mijë e 554 Euro. Është 200 metër nënkalim. Kjo kosto këtu ka plus 5 për qind fond rezervë. Do të marrë 18 javë. Ky është grafiku i punimeve për ndërtimin. Ai nënkupton 12 procese pune që janë të përcaktuara sipas njësisë, varet si janë. Secila nga këto ka sasinë, edhe këtu tregohet procesi sipas javëve. 

Tuneli që propozon Belind Këlliçi nën sheshin “Skëndërbej”

Kandidati për Bashkinë e Tiranës, Belind Këlliçi, prezantoi këtë të enjte projektin e nënkalimit tek “Sheshi Skënderbej”. Ky është një ndër premtimet elektorale te koalicionit “Bashkë Fitojmë” përfshirë edhe transportin publik falas.

Gjatë prezantimit të planit urbanistik për këtë projekt, Këlliçi premtoi edhe një rikonceptim të planit për parkingjet.

“Nëse vazhdohet kështu në Tiranë, ky qytet do të bjerë në kolaps. Në të vërtetë, jemi shumë afër kësaj pike. Sepse nuk mund të vazhdohet me ndërtimet pa asnjë planifikim urban, nuk mund të vazhdohet me flotë autobusësh që janë jashtë kondicioneve teknike, nuk mund të vazhdohet pa parkime, pra, nuk mund të vazhdohet pa e rikonceptuar të gjithë këtë çështje nga e para!

Trafiku në Tiranë është një çështje e cila duhet zgjidhur me prioritet absolut, për të gjtha arsyet e përmendura më sipër. Por siç edhe të gjithë e dimë, ajo duhet të vijë nga një sërë ndërhyrjesh që kanë lidhje me transportin cilësor, të sigurt dhe falas, me korsi të dedikuara të autobusëve të shpejtë, me biletat elektronike dhe aplikacionet ndihmuese për udhëtarët, me riikonceptimin total të lëvizshmërisë në Tiranë, me hapjen e rrugëve të reja dhe rikualifikimin e rrugëve dytësore, të cilat mund të shfryjnë trafikun, me vepra infrastrukturore që nuk zgjasin pafund siç është rasti i Unazës së Madhe, me një plan të mirëfilltë për parkimin, si dhe me policinë bashkiake që nuk është aty vetëm për gjoba, po për të ofruar ndihmë dhe zgjidhje”, tha Këlliçi gjatë prezantimit.