Kontrolle në akset rrugore në Dibër/ 575 gjoba në 10 ditë për drejtuesit e mjeteve

Akset nën monitorim të pandërprerë, me pajisje të logjistikës bashkëkohore, të loguara dhe të paloguara, me qëllim menaxhimin e trafikut dhe evidentimin e shkeljeve që janë burim aksidenti apo që bëhen pengesë për qarkullimin.

Gjatë 10 ditëshit të parë të muajit Qershor, arrestohen/procedohen penalisht 7 drejtues automjetesh për veprat penale "Drejtimi i mjeteve në mënyrë të parregullt" dhe "Shkelja e rregullave të qarkullimit rrugor", si dhe janë vendosur gjithsej 575 masa administrative për shkelje të ndryshme të Kodit Rrugor, konkretisht:

• 44 masa për mosvënien e rripit të sigurimit;
• 14 masa për mosvënien e kaskës mbrojtëse;
• 3 masa për përdorimin e celularit gjatë drejtimit të mjetit;
• 5 masa për drejtim mjeti nën efektin e alkoolit;
• 1 masë për xhama të errësuar;
• 91 masa për parakalime të gabuara;
• 188 masa për ndalim apo qëndrim të gabuar;
• 14 masa për mosdhënie përparësie këmbësorëve;
• 215 masa për shkelje të tjera të Kodit Rrugor.

Kontrolle të tilla vijojnë çdo ditë nga Policia Rrugore, të shtrira në të gjitha akset rrugore urbane, interurbane dhe rurale, duke përdorur të gjitha mjetet bashkëkohore logjistike, me qëllim përmbushjen e parametrave të sigurisë rrugore.

Policia Rrugore e Dibrës apelon për të gjithë drejtuesit e mjeteve, të zbatojnë me rigorozitet rregullat e qarkullimit rrugor, të mos kryejnë parakalime të gabuara, të mos përdorin celularin gjatë drejtimit të mjetit dhe të mos drejtojnë mjetin, në efektin e alkoolit apo në gjendje të dehur.

Siguria rrugore gjatë sezonit turistik/ 16 të arrestuar dhe 1600 gjoba në Vlorë

Intensifikohen kontrollet gjatë 10 ditëve të para të qershorit, arrestohen/procedohen penalisht 16 drejtues mjetesh dhe vihen mbi 1600 masa administrative për shkelje të ndryshme të Kodit Rrugor.

Në kuadër të masave për rritjen e sigurisë rrugore dhe menaxhimin e fluksit në zonat turistike, strukturat e Qarkullimit Rrugor në Vlorë dhe në Sarandë kanë intensifikuar kontrollet në akset kryesore urbane dhe interurbane, gjatë 10 ditëve të para të qershorit.

Kontrollet janë përqendruar në parandalimin e shkeljeve që përbëjnë rrezik për jetën e përdoruesve të rrugës, si dhe në garantimin e një ambienti të sigurtë për qytetarët dhe vizitorët që frekuentojnë bregdetin.

Si rezultat i kontrolleve, u arrestuan/proceduan gjithsej 16 drejtues mjetesh, për shkelje të ndryshme të Kodit Rrugor.

Gjithashtu, janë vënë 1683 masa administrative, për shkelje të tilla si: tejkalimi i shpejtësisë, parakalime të gabuara, mosvënia e rripit të sigurimit, përdorimi i celularit gjatë drejtimit të mjetit, mosvendosja e kaskës mbrojtëse nga drejtuesit e motomjeteve, drejtimi i mjetit nën efektin e alkoolit, si dhe shkelje të tjera në kundërshtim me dispozitat e Kodit Rrugor.

Strukturat e Policisë Rrugore do të vijojnë kontrollet e shtuara gjatë gjithë sezonit veror, në të gjithë Qarkun Vlorë, me qëllim rritjen e parametrave të sigurisë rrugore.