Bënte gara me makina në rrugët e Tiranës dhe i publikonte në Instagram, e pëson keq shoferi i “Benz-it” luksoz!

3 muaj, 1 javë më parë - 28 Gusht 2022, Gazeta Shqiptare
Bënte gara me makina në rrugët e Tiranës dhe i publikonte në Instagram, e pëson keq shoferi i “Benz-it” luksoz!
Policia e Tiranës ka gjobitur me masë administrative 40 mijë lekë të rinj drejtuesin e një mjeti tip “Benz”, i cili kryente gara me një mjet tjetër në bulevardin “Zogu i parë” në kryeqytet.

Policia njofton se po kryhen hetime dhe për identifikimin e personit me të cilat personi i ndaluar po zhvillonte gara.

Gjurmimi i të rinjve u bë përmes videove të postuara në Instagram, ç’ka ka vendosur në lëvizje dhe efektivët e policisë rrugore.

NJOFTIMI I POLICISË

Bënte gara shpejtësie dhe i filmonte e i pasqyronte ato në rrjete sociale, kapet dhe ndëshkohet nga Policia Rrugore e Tiranës me masë administrative 40.000 lekë të rinj. Vijon puna për kapjen edhe të drejtuesit një automjeti tjetër që bënte gara shpejtësie me të. Policia Rrugore e Tiranës, krahas kontrolleve intensive të kryera për parandalimin e aksidenteve rrugore dhe evidentimin e ndëshkimin e shkelësve të rregullave të qarkullimit rrugor, ka nisur një punë verifikuese për videot e publikuara në rrjetet sociale që tregojnë qartazi shkeljen e rregullave të qarkullimit rrugor. Në kuadër të verifikimeve, është bllokuar automjeti tip Benz, me drejtues shtetasin O. SH., i cili, në bulevardin “Zogu i parë”, ka kryer bashkë me drejtuesin e një automjeti tjetër, gara shpejtësie dhe i ka pasqyruar ato në rrjete sociale. Policia Rrugore e ka ndëshkuar drejtuesin e automjetit tip “Benz” me masë administrative 40.000 lekë të rinj, si dhe vijon puna për kapjen edhe të drejtuesit të automjetit tjetër që bënte gara shpejtësie bashkë me drejtuesin e automjetit tip “Benz”. Policia Rrugore e Tiranës apelon për të gjithë drejtuesit e mjeteve që të respektojnë rregullat e qarkullimit, të mos kryejnë gara shpejtësie, të vendosin rripin e sigurimit , të mos përdorin celularin gjatë drejtimit të mjetit, të mos kryejnë parakalime të gabuara, si dhe të mos drejtojnë mjetin nën efektin e alkoolit apo në gjendje të dehur.

Support Ukraine