Autobusët “Go Green”, Rama: Në gusht nis linja e madhe me 66 stacione

Autobusët “Go Green”, Rama: Në gusht nis linja e madhe me 66 stacione

Autobusët e gjelbër “Go Green”, do te futen në qarkullim në gusht dhe do të përshkruajnë linjën e madhe unazore prej 13.2km me 66 stacione.

Lajmi është bërë i ditur nga kryeministri Edi Rama nëpërmjet një postimi në Facebook, duke e konsideron vënien në përdorim të autobusëve të gjelbër “Go Green”si një gjeneratë e re e transportit publik.

“Mirmëngjes dhe me gjeneratën e re të transportit publik, autobusët hibridë elektrikë që do të hyjnë në shërbim për Tiranën e gjelbër e të pastër, ju uroj një të diel të bukur. Në Gusht nis linja e madhe unazore 13.2km me 66 stacione”, shkruan Rama.

Kujtojmë se flota e re e autobusëve të gjelbër “Go Green” u prezantua një ditë më parë nga kreu i Bahskisë së Tiranës, Erion Veliaj, i cili u shpreh se kjo është pjesë e një procesi për modernizimin e transportit publik në Tiranë.

Pezullimi i aboneve, Velaj: Falsifikoheshin, do largohen nga qarkullimi

Kryetari i Bashkisë së Tiranës, Erion Veliaj ka shpjeguar se pezullimi i aboneve të përgjithshme në Tiranë, u bë për të parë se cilat linja autobusësh spekulonin me to.

Në prezantimin e linjës së gjelbër dhe flotës së parë të autobusëve hibrid/elektrik në Tiranë, Veliaj deklaroi se kompani spekulante kanë falsifikuar në shumë raste abonetë dhe biletat.

“E kishim të nevojshme që ta pezullonim qoftë edhe një muaj abonenë e përgjithshme, ndërkohë që abonetë e tjera u shitën normalisht në treg, për të kuptuar se cila nga linjat funksiononte, cila gënjente, cila abuzonte dhe cila bënte evazion. Shpeshherë jemi lënë në baltë edhe nga prokuroria, edhe nga ata që kanë filluar hetimet për linja që dihen botërisht se janë spekulantë, por na duhet një dokument ligjor. Janë kapur linja që falsifikojnë bileta, që falsifikojnë abonenë, janë kapur linja që i shesin ato në treg të zi dhe spekulojnë me mënyrën se si funksionon aboneja e përgjithshme “, theksoi Veliaj.

Kreu i Bashkisë paralajmëroi ndër të tjera se të gjitha kompanitë që janë kapur në shkelje dhe kanë abuzuar me shërbimin ndaj qytetarëve, nuk do të lejohen të operojnë më.

“Ishte shumë e rëndësishme të përgatiteshim për hapjen e një linje të re, duke kuptuar dhe duke bërë një analizë se çfarë nuk shkonte me linjat e vjetra. Bashkë me lajmin e mirë të hapjes së linjës së re, do të kemi edhe disa lajme të tjera për disa linja që nuk do të vazhdojnë më funksionimin në qytetin e Tiranës, o prej ndotjes së jashtëzakonshme që kanë prodhuar, ose prej faktit se në mënyrë sistematike mashtrojnë publikun dhe Bashkinë e Tiranës, si me abonetë, si me biletat, si me shërbimin”, tha Veliaj.