Aksident në Sarandë/ Polici humb kontrollin e makinës dhe del nga rruga

Uniformat blu bëjnë të ditur se efektivi po udhëtonte në aksin rrugor “Sarandë-Krane”, me makinën e punës, kur në rrethana momentalisht të paqarta humbi kontrollin dhe përfundoi jashtë rruge.

Ai u dërgua në spital për ndihmë mjekësore dhe është jashtë rrezikut për jetën.

“Në aksin rrugor “Sarandë-Krane”, punonjësi i Stacionit të Policisë Livadhja, inspektor D. M., duke drejtuar automjetin e Policisë tip “Land Rover”, dyshohet se ka humbur kontrollin mbi drejtimin e automjetit dhe si pasojë automjeti ka dalë nga rruga.

Nga kryerja e testit të alkoolit, punonjësi i Policisë rezultoi 0.00 mg/l. Aktualisht ai ndodhet në spitalin e Sarandës, jashtë rrezikut për jetën. Grupi hetimor po punon për zbardhjen e plotë të rrethanave të aksidentit”, njofton policia.

Makina përfshihet nga flakët në aksin Qafë Thanë-Pogradec

Një makinë është përfshirë nga flakët këtë mëngjes në aksin rrugor “Qafë Thanë-Pogradec”.

Për pasojë, automjeti tip “Ford” u dogj, ndërsa drejtuesi me iniciale B. M., banues në Korçë doli në kohë nga mjeti, duke i shpëtuar lëndimeve.

Grupi hetimor po punon për përcaktimin e shkaqeve të rënies së zjarrit, ku paraprakisht dyshohet të ketë rënë për shkaqe aksidentale.

Automjeti pësoi defekt, mbeten të bllokuar dy turistë francezë në Përmet

Shërbimet e Komisariatit të Policisë Përmet iu shkojnë në ndihmë 2 turistëve francezë, të cilët kishin mbetur në mesnatë, në fshatin Pavar, për shkak të një defekti në automjetin e tyre.

Sapo janë njoftuar, rreth orës 00:20, se 2 turistë francezë kishin mbetur në territorin e fshatit Pavar, për shkak se automjeti me të cilin eksploronin zonën, kishte defekt, shërbimet e Komisariatit të Policisë Përmet kanë shkuar në zonë, për t’ju ofruar ndihmë.

Turistët janë lokalizuar dhe janë transportuar nga shërbimet e Policisë, në hotelin ku ishin akomoduar, në Këlcyrë, në gjendje të mirë shëndetësore. Gjithashtu, është transportuar automjeti i tyre.