7 klandestinë dhe shoferi, viktima të aksidentit/ Avokati i Popullit ngre kambanë alarmi

Me anë të një deklarate për mediat, Avokati i Popullit shpreh shqetësim të madh dhe kërkon forcimin e masave ndaj kontrollit të emigracionit të paligjshëm.

Ai thekson se duhen promovuar rrugë legale dhe të sigurta për emigracionin.

“Avokati i Popullit ka përcjellë me shqetësim të thellë ngjarjen e rëndë të aksidentit tragjik në aksin rrugor Këlcyrë-Përmet, që solli për pasojë 8 viktima.

Emigrimi i jashtëligjshëm është një sfidë mbarëbotërore dhe çështje e ndjeshme për shoqërinë në tërësi, me të cilën po përballemi fort në dekadën e fundit edhe në vendin tonë.

Ka shumë arsye që njerëzit vendosin të emigrojnë, përfshirë shkëputjen nga konfliktet, kërkesën për mundësi të reja punësimi dhe dëshirën për të përmirësuar cilësinë e jetës së tyre dhe të familjes.

Kjo ngjarje duhet të shërbejë si kambanë alarmi për forcimin e masave ndaj kontrollit të emigrimit të paligjshëm dhe për të promovuar rrugë legale dhe të sigurta për emigracionin. Adresimi në nivel global i çështjes së migracionit duke trajtuar shkaqet në origjinë, është e vetmja zgjidhje e qëndrueshme.

Forcimi i ligjit dhe zbatimin të tij, krijimi i mundësive legjitime për emigracion dhe azil, si dhe bashkëpunimi ndërkombëtar për të adresuar shkaqet themelore të emigrimit të paligjshëm janë çështjet që duhen adresuar me prioritet.

Është e rëndësishme që politikat dhe ligjet të mbrojnë të drejtat e emigrantëve dhe të sigurojnë që ata të trajtohen me dinjitet dhe respekt. Për sa më sipër, Avokati i Popullit ka hartuar disa raporte dhe ka dhënë rekomandime ku ka adresuar çështje me rëndësi mbi këtë temë.

Kjo ngjarje duhet të na kujtojë për rëndësinë e jetës dhe nevojën për ta ruajtur dhe mbrojtur jetën njerëzore në çdo rrethanë”, nënvizon Avokati i Popullit.

Aksidenti me 8 viktima në Këlcyrë/ Arrestohen 2 persona

Dy persona janë vënë në pranga këtë të mërkurë në lidhje ngjarjen e djeshme në Këlcyrë, ku një person që transportonte klandestinë pësoi aksident me makinë dhe si pasojë u regjistruan 8 viktima.

Të arrestuarit akuzohen se kanë dhënë ndihmë për kalim të paligjshëm të kufirit.

Ata janë kapur në Shkodër për llogari të policisë së Gjirokastrës.

Kujtojmë se personi me emigrantë të paligjshëm tentoi t’i ikte policisë, por humbi drejtimin e mjetit dhe ra në anë të lumit Vjosa.

Si pasojë humbi jetën shoferi dhe 7 emigrantët e paligjshëm, që dyshohet se janë me origjinë nga Pakistani.

Makina përfundon jashtë rruge/ Plagoset pasagjeri në Maliq

Një aksident ka ndodhur pak minuta më parë në aksin rrugor Pogradec-Maliq, ku është plagosur një person.  Ngjarja ka ndodhur në afërsi të kryqëzimit të fshatit Sovjan, ku një mjet ka dalë nga rruga duke u përplasur me një tumbinë betoni, duke shkaktuar kështu plagosjen e pasagjerit që udhëtonte në mjet.

Sipas policisë, drejtuesi i mjetit ka qenë duke lëvizur me shpejtësi tej normave të lejuara dhe në rrethana ende të paqarta për dinamikën e aksidentit, mjeti ka përfunduar në kanalin anës rrugës duke vazhduar ecjen për më shumë se 30 metra për t'u përplasur më pas me betonin që shërben si urë kalimi ngjitur me rrugën kryesore.

I dëmtuari është dërguar në spitalin e Korçës me fraktura në këmbë pa probleme për jetën.

Segmenti rrugor nga Pirgu në Sovjan është një segment me aksidente jo të pakta, në të shumtën e rasteve dhe për policinë, për shkak të shpejtësisë tej normave të lejuara.