Vjen lajmi i mirë: Shtyhet deri në fund të vitit vlefshmëria e kartave ID

30 Janar 2019 - Gazeta Shqiptare

Vjen lajmi i mirë: Shtyhet deri në fund të vitit vlefshmëria e kartave ID

Shtyhen deri në fund të vitit, vlefshmëria e të gjitha kartave të ID që skadojnë këtë vit.

Lajmin e mirë e ka dhënë Ministri i Brendshëm Sandër Lleshaj, gjatë një inspektimi që bëri bashkë me kreun e Bashkisë së Tiranës Erion Veliaj në zyrat e reja të Gjendjes Civile në Rrugën “Bardhyl”, të cilat u vijnë në ndihmë 120 mijë banorëve të Njësive 3 dhe 4.

Në fjalën e tij, Lleshaj tha se është vendosur të zgjaten deri më 31 dhjetor 2019 vlefshmëria e të gjitha letërnjoftimeve, si dhe njëkohësisht do të ketë shërbime që do të ofrohen edhe në fundjavë.

“Është rezultat i një pune intensive që është bërë ditët e fundit, për të rritur kapacitetet e prodhimit për kartat e identitetit edhe në prag të zgjedhjeve, por edhe për të përballuar fluksin e madh i cili lidhet me skadimin e një numri shumë të madh kartash, të cilat janë prodhuar pothuajse në të njëjtën kohë në vitin 2009. Bashkia e Tiranës dhe Ministria e Brendshme kanë ndërmarrë masa për të zgjeruar kapacitetet dhe për të përmirësuar kushtet e aplikimit”, nënvizoi Lleshaj.

Ministri tha se modeli i suksesshëm që po aplikohet në Tiranë do të shtrihet edhe në qytetet e tjera të vendit, ku do të hapen zyrat e reja të aplikimit.

“Kemi ardhur këtu edhe për të dhënë një mesazh, për të dhënë edhe një model se si duhet të shndërrohen zyrat e aplikimit në gjithë vendin, të cilat duhet të marrin këtë trajtë ose edhe më mirë. Po e fillojmë nga Tirana me shpresën se Tirana do të përbëjë modelin e duhur për t’u ndjekur nga qytetarët. Përveçse shtimit të kapaciteteve dhe përmirësimit të kushteve, qeveria shqiptare do të ndërmarrë masa edhe për të zgjatur vlefshmërinë e kartave të identitetit që skadojnë në vitin 2019. Pra, dua të krijojmë një mundësi që asnjë qytetar shqiptar të mos ngelet qoftë edhe për një arsye të vetme pa realizuar të drejtën e votimit për shkak të kartës”, tha Lleshaj.

Shiteni Makinën Tuaj