Tritol makinës së prokurorit Kuliçi, reagon Prokuroria e Vlorës

Në një njoftim për mediat, Prokuroria thotë se "ky është një akt kriminal, i papranueshëm me sistemin tonë të drejtësisë, parimet e Shtetit të së Drejtës, vlerat dhe parimet shoqërore, që synon të cënojë detyrën e tij si prokuror dhe gjithashtu të intimidojë në luftën kundër krimit."

Më tej Prokuroria shton se ajo është në mbështetje të kolegut të tyre dhe do të mbetet e pa ndikuar në luftën kundër krimit të organizuar.

Mbrëmjen e 21 Dhjetorit, persona ende të paidentifikuar kanë hedhur një sasi lëne plasëse në makinën e parkuar të prokurorit Kuliçi.

Pas këtij sulmi ka reaguar dhe kryeprokurori i Përgjithëshëm, Olsian Çela i cili u shpreh se "aktet e dhunës ndaj magjistratëve, qartësisht synojnë pengimin e funksionimit normal të sistemit të drejtësisë dhe cënojnë rëndë rendin dhe sigurinë publike." . Ai i bëri gjithashtu thirrje organeve ligjzbatuese të vënë para përgjegjësisë autorët të cilët vunë lëndën eksplozive ndaj Kuliçit.

Albert Kuliçi, me origjinë nga Tropoja, ka patur në dorë vitet e fundit çështjet më të bujshme në qytetin bregdetar, duke filluar nga skandali i tjetërsimit të pronave në Karaburun dhe Zvërnec, ku i përfshirë ishte edhe biznesmeni Pëllumb Petritaj dhe 4 zyrtarë u dënuan me burg, deri te koncesioni i parkingjeve në qytetin bregdetar, i cili u anulua pasi u konstatuan një seri shkeljesh.

Kuliçi ka hetuar edhe një aferë në Albpetrol, si dhe ka kërkuar vendosjen e sekuestros për një pallat 11 katësh në Vlorë, për të cilin u akuzua për shpërdorim detyre ish-kryebashkiaku Shpëtim Gjika.