Sulmi ndaj makinës së Fatos Lubonjës, reagon Policia e Shtetit

9 Korrik 2019 - opinion

Sulmi ndaj makinës së Fatos Lubonjës, reagon Policia e Shtetit

Policia e shtetit ka reaguar në lidhje me sulmin ndaj makinës se analistit Fatos Lubonja.

Ajo sqaron në njoftimin e saj dëmtimi i makinës është bërë nga shtetasi A.H i cili vuan nga shëndeti mendor.

Siç raporton policia, ata ishin vënë në ndjekje të këtij personi në datën 1 korrik 2019, pasi ai kishte kërcënuar disa kalimtarë me mjete prerëse. Në tentativë për t'u larguar ai ka thyer xhamin e makinës së parkuar në hyrjen e pallatit ku banonte.

Nga njoftimi i policisë bëhet e ditur se përdoruesi i automjetit është vëllai i zotit Fatos Lubonja, pasi ai e ka deklaruar këtë gjë kur ka bërë kallëzimin në polici.

Njoftimi i policisë:

Në përgjigje të zhurmës mediatike që po bëhet për dëmtimin e xhamit të automjetit të zotit F. Lubonja, Policia e Shtetit sqaron:

Më datën 1 korrik 2019, shërbimet e Komisariatit Nr. 2, pas marrjes së një njoftimi, u vunë në ndjekje të një personi që po kërcënonte me mjete prerëse disa kalimtarë. Në tentativë për t'u larguar, shtetasi A.H. theu me sende të forta xhamin e një mjeti të parkuar në hyrje të pallatit ku banonte. Agjentët arrestuan 50 vjeçarin, nga Tirana.

Ndaj tij bëri kallëzim për dhunë në familje edhe bashkëshortja, e cila deklaroi se ai vuante prej disa vitesh nga shëndeti mendor.

Për dëmtimin e mjetit bëri kallëzim shtetasi A.L, vëllai i zotit F. Lubonja, i cili deklaroi se ishte përdoruesi faktik i automjetit, se agresorin e kishte fqinj dhe se ky i fundit kishte shfaqur probleme mendore.
Materialet i kanë kaluar Prokurorisë për "Dhunë në familje", "Kanosje", "Shkatërrim prone", "Prishja e qetësisë publike" dhe "Mbajtje pa leje të mjeteve prerëse, të dyshuara si armë të ftohta".

Me këtë rast, Policia e Shtetit hedh poshtë si të pavërteta dhe dashakeqe të gjitha insinuatat e bëra në drejtim të punës së saj, e cila, edhe në këtë rast, ka qenë plotësisht profesionale.

Shiteni Makinën Tuaj