Skema mashtruese me tollonat e Gulf, qytetarët kanë në dorë vetëm denoncimin

Burime nga policia e Tiranës, bëjnë me dije se janë me dhjetëra denoncime në ditë që vijnë nga qytetarët për menaxherin e Kompanisë Alban Aliko dhe administratorin gjeorgjian Irakli Svanidze.

Po të njëjtat burime saktësojnë se vetëm gjatë ditës së djeshme, mbi 15 qytetarë kanë denoncuar shitjen e tollonave nga kompania, duke mos patur gjendje nafte në depozitat e tyre.

"Më datë 22.04.2018, u referuan materialet në Prokurorinë pranë Gjykatës së Shkallës Parë Tiranë, për shtetasit I.S., dhe A.A., 40 e 48 banues në Tiranë, administrator dhe menaxher i një shoqërie pasi me anë të mashtrimit, kanë përvetësuar shuma të mëdha lekësh, pasi kanë shitur tollona, duke mos patur gjendje nafte në depozitat e tyre, në bazë të kallëzimit të shtetasit H. M., vjeç 53, banues në Tiranë. Nenet 143 dhe 194 të Kodit Penal.

Më datë 23.04.2018, u referuan materialet në Prokurorinë pranë Gjykatës së Shkallës Parë Tiranë, për shtetasit I.S., dhe A.A., 40 dhe 48 vjeç, banues në Tiranë, me detyrë administrator kompanish, pasi më datë 19.04.2018, ka bërë kallëzim shtetasi H.I., vjeç 39 banues Tiranë, se me anë të mashtrimit kanë përvetësuar një sasi lekësh për shitjen e litrave të naftës. Punohet për kapjen e tyre. Nenet 143, 194 e 180 të Kodit Penal." Thuhet në njoftimin e policisë së Tiranës në vetëm dy nga dhjetëra rastet e shumta të denoncimeve ndaj drejtuesve të kompanisë "Gulf".

Për të paktën 4 ditë, nga datat 15 prill deri në 19 prill u shfrytëzua shitja e tollonave. Në total, dëmi që i krijoi klientëve, të cilëve u kanë mbetur në dorë tollonë pa vlerë, është 1.5 milionë euro.

"Gulf" e nisi aktivitetin e vet në Shqipëri në shator të vitit 2013 me krijimin e shoqërisë "Sun Petroleum". 6 muaj më vonë, në shkurt të vitit 2014, shoqëria u ble nga kompania "offshore" "Universal Energy Group", duke krijuar kështu një skemë zinxhir kompanish guaskë, përmes së cilës nuk mund të arrihet tek pronarët e vërtetë.