Shoqata e transportit konfirmon hapjen e urbanëve, me rregulla të reja

6 Korrik 2020 - opinion

Shoqata e transportit konfirmon hapjen e urbanëve, me rregulla të reja

Shoqata e Transportit ka njoftuar zyrtarisht rikthimin e shërbimit të transportit urban në kryeqytet duke nisur nga dita e hënë, pas dakordësimit të disa kushteve me Bashkinë e Tiranës.

"Pas zgjidhjes së pjesshme të kërkesave tona, tashmë të bëra publike, në marrëveshje me Kryetarin e Bashkisë, Veliaj, Ju bëjmë me dije vendimin e të gjithë operatorëve të transportit publik në qytetin e Tiranës për rifillimin e shërbimit të transportit qytetës në Tiranë në kushte të reja në përputhje me situatën epidemike. Bashkia Tiranë, sipas kërkesës tone, ka rishikuar dhe ka bërë ndryshimin e protokollit të sigurisë, ku ndër të tjera, sipas legjislacionit në fuqi, ka lehtësuar përgjegjësinë ligjore të operatorëve duke bërë të mundur operimin në linjë" thuhet në një njofim të kësaj shoqate. Por nga tjetër, bëhet me dije se mënyra e funksionimit të tansportit urban do të vijojë në përshtatje me rregulla të reja, të kushtëzuar nga COVID-19.

"Bazuar nga sa më lart, ne, operatoret e transportit publik në Tiranë, kemi marrë vendimin për të rifilluar shërbimin në linja me kapacitete të përshtatura me kushtet e reja, në respekt të kërkesës së Kryetarit të Bashkisë dhe të qytetarëve të Tiranës, me qëllim mundësimin e ofrimit të këtij shërbimi në qytet. Ndërkohë me Bashkinë Tiranë do të vijojnë diskutimi i kushteve për hartimin e një kontrate shtesë me kushte dhe afate të përcatuara për zbatim nga secila prej palëve (bashkia dhe operatorët). Moszabtimi i kushteve të kontratës shtesë do të përbëjë shkak në ditët në vijim për rindërprejen e këtij shërbimi. Mbetemi shpresë plot se do të plotësohen edhe kërkesat tona ekonomike, të dakortësuara në marrëveshjen me bashkinë, pasi në rast të kundërt, situata e krijuar do të na çojë drejt falimentit të sigurt. I bëjmë thirrje të gjithë përdoruesve të transportit publik, të respektojnë protokollin e sigurisë antiCovid-19, për shëndetin e tyre dhe të stafit tonë", njofton Shoqata e Transportit.

Merret vendimi për transportin urban, ja kur nisin punën të gjitha linjat

Transporti publik qytetas dhe rrethqytetas do të rinis punën normalisht të hënën.

Të gjitha linjat e urbaneve në Tiranë do të jenë në shërbim të qytetarëve, por duke respektuar rregullat e sigurisë. Pas dakordësisë së arritur mes kryebashkiakut të Tiranës Erion Veliaj me Shoqatën e Shoqërive të Transportit Publik, të gjithë autobusët do të operojnë me të njëjtat frekuenca.

Ashtu si punonjësit e shërbimit të transportit publik edhe qytetarët nuk do të lejohen të përdorin këtë shërbim pa u pajisur me maskë, ndërsa do të duhet të ruajnë dhe distancat fizike.

Përdorimi i maskës për qytetarët do të jetë e domosdoshme edhe në stacionet pritëse të autobusëve urban.

Një tjetër rregull që do të zbatohet në kuadër të masave anticovid është edhe ajrosja e autobusëve gjatë lëvizjes.

Përgjatë gjithë kohës së udhëtimit do të behet ajrimi i ambienteve të brendshme nëpërmjet sistemeve të ajrimit të vendosura në pjesën e sipërme të mjetit ose duke mbajtur hapur dritaret.

Po ashtu urbanet do të dezinfektohen në mënyrë periodike nga operatori transportues dhe stafi i tij.