Shembet ura në fshatin Darzezë, izolohen 400 familje. Nis rindërtimi provizor, forcohet argjinatura e kanalit

7 Dhjetor 2017 - Gazeta Shqiptare

Shembet ura në fshatin Darzezë, izolohen 400 familje. Nis rindërtimi provizor, forcohet argjinatura e kanalit

Operacionet për të përballuar situatën e vështirë të krijuar nga moti i keq vazhdojnë në jug të vendit.

 Disa fshatra në Fier dhe Vlorë janë nën pushtetin e ujit. Prurjet e lumit kanë përmbytur totalisht 2 fshatrat e Fierit, Darzezë dhe Povelçë, të Njësisë Administrative Dërmenas. Ditën e djeshme prezenca e ujit është tërhequr jo pak dhe rruga është bërë e kalueshme për fuoristradat, por gjithsesi rreziku mbetet evident. Si pasojë e shembjes së urës në orët e para të mëngjesit të djeshëm, kanë mbetur të izoluara 400 familje të Darzezës.

Rreth 40 efektivë të Forcave të Armatosura vijojnë që prej mbrëmjes së të shtunës të qëndrojnë në Darzezë të Fierit, të cilët kanë vendosur thasë me rërë në të dy anët e argjinaturës së kanalit kullues, si dhe po ndihmojnë banorët e prekur nga përmbytjet. Ndërkohë në orët e vona të mbrëmjes së djeshme mësohet se kanë mbërritur pjesët e urës provizore në Darzesë. Forcat xhenio të ushtrisë vazhduan punimet gjatë natës për montimin e urës, e cila do të mundësojë edhe kalimin e mjeteve nga aksi rrugor deri në fshatin e Darzezës së Fierit. Bëhet me dije se fadromat po hedhin gurë për të parandaluar gërryerjen e mëtejshme të kanalit, ndërsa pritet të vendoset edhe ura metalike. Ministrja Olta Xhaçka, e cila ndodhet që prej mbrëmjes së të shtunës në këtë zonë po monitoron situatën. Xhaçka tha se situata është përmirësuar dhe lumenjtë nuk rrezikojnë më përmbytje. Ajo u shpreh se forcat e FA dhe punonjësit e institucioneve të tjera qëndrojnë 24 orë në gatishmëri. "Situata është përmirësuar. Lumenjtë nuk rrezikojnë më përmbytje. Janë evakuuar rreth 60 familje.

Akset kryesore janë të lira. Kemi problematikë për disa ura të shembura, por prezenca më e madhe ka qenë më e madhe në Darzezë. 6 elektropompa janë vendosur në funksion dhe FA kanë punuar për të mbrojtur argjinaturën e lumit. Kemi pasur bashkëpunim me të gjithë aktorët dhe kemi pasur mbështetje edhe nga Kosova. Kemi bërë të mundur që situatën ta menaxhojmë më mirë. Grupet e FA dhe të gjithë punonjësit e institucioneve qëndrojnë 24 orë në gatishmëri për të ndihmuar qytetarët në Darzezë. Jemi natë ditë në punë për të ndihmuar të gjithë të prekurit. Nuk do kemi agravim të situatës për ditët në vijim dhe pjesa e emergjencës ka kaluar", – tha Xhaçka. Ndërkohë, edhe kreu i Bashkisë Fier, Armando Subashi tha se pushteti vendor ka marrë masat për të mos pasur probleme. "Situata është në nivele kritike, por është në kontroll. Të gjithë jemi në këmbë me Forcat e Armatosura, me bashkinë dhe besoj se situatën do ta kalojmë me sukses. Ujërat janë në nivele të konsiderueshme, por besoj se nuk do kemi probleme me masat që janë marrë", – tha Subashi.

Shiteni Makinën Tuaj