Reshjet e shiut shkaktojnë rrëshqitje dheu në bypass-in e Vlorës, bllokohet rruga

Si pasojë rruga që lidh Vlorën me Kaninën dhe Orikumin është e bllokuar.

Ndërkohë disa rrugë të qytetit, si në lagjen Rilindja apo 28 nëntori, janë ende nën ujë, edhe pse reshjet kanë ndaluar.

Po ashtu shumë familje dhe biznese janë ende nën ujë, pas rënies së reshjeve intensive.

Vlora “nën ujë”, Ministri i Mbrojtjes: Po punojmë në 4 kryqëzimet që të bllokuara

Ministri i Mbrojtjes, Pirro Vëngu ka reaguar pas situatës problematike në Vlorë, ku reshjet intensive të shiut përmbytën pjesën më të madhe të qytetit.

Vëngu shprehet se puna është fokusuar në 4 kryqëzimet ende të bllokuara të qytetit të Vlorës.

Ai lajmëron se po punojnë 24 efektivë të Forcave të Armatosura, me 5 mjete transporti, 3 mjete të kalueshmërisë së lartë dhe 2 pompa thithëse.

Sipas ministrit energjia elektrike është stakuar në disa nga zonat e qytetit për shkak se gabinat e energjisë janë të mbushura me ujë.

“Të gjitha strukturat e emergjencave civile vijojnë të jenë të angazhuara në terren që prej pasdites së djeshme, për të riparuar të gjitha problematikat e shkaktuara nga reshjet me intensitet të lartë. Si pasojë e punës së bërë gjatë gjithë natës dhe ndërprerjes së reshjeve, situata është përmirësuar.

Aktualisht, puna e të gjitha strukturave: Bashkisë së Vlorës, UK Rajoni Vlorë, Drejtoria Vendore e Policisë, OSHEE, Prefekturës, është përqendruar në 4 kryqëzime ende të bllokuara në qytetin e Vlorës, i cili u prek më shumë nga situata e keqe e motit në 24 orët e fundit.

Në mbështetje të tyre janë edhe 24 efektivë të Forcave të Armatosura, me 5 mjete transporti, 3 mjete të kalueshmërisë së lartë dhe 2 pompa thithëse.

Trupat në terren po punojnë për largimin e ujit në blloqet e banesave midis akseve të bllokuara: te Universiteti, rruga “Albano e Romina”, Dyqanet e reja, si dhe te Kisha Ortodokse. Prezencë uji ka dhe brenda xhamisë së qytetit.

Efektivët e FA po punojnë me dy pompa për largimin e ujit nga stacioni kryesor i pompimit, ku ende vazhdon të ketë prezencë uji.

Hidrovori i qytetit punon me kapacitet të plotë, duke bërë tërheqjen graduale të ujit.

Është stakuar energjia elektrike në disa blloqe banesash të qytetit, kryesisht aty ku gabinat elektrike kanë prani uji”, tha Vëngu.

Niveli i ujit, deri në 2 metra lartësi/ Dëmet pas përmbytjeve në Vlorë

Qarku i Vlorës u përfshi të premten nga reshje të pazakonta shiu të cilat kanë krijuar përmbytje në disa zona.

Po ashtu raportohet për dëme të shumta edhe në banesa e biznese.

Këto janë pamjet se si paraqitet tashmë situata në Vlorë, një ditë pas reshjeve.

Problematika ka që në rrugët e hyrjes së qytetit, autostradën Vlorë-Fier dhe rrethinat e qarkut të Vlorës.

“Gjergj Araniti” dhe “Hasan Kushta” janë rrugët më problematike në qytet.

Gjithashtu mësohet se uji në disa zona ka qenë deri në dy metra lartësi.

Vlora si Venecia! Uji mbulon rrugët e makinat

Reshje intensive shiu kanë përfshirë të gjithë vendin tonë këtë të premte. Në disa qytete ka pasur përmbytje të rrugëve duke shkaktuar trafik të rënduar.

Këto janë pamjet që vijnë nga qyteti i Vlorës. Siç mund të shihet, uji ka vërshuar nëpër rrugë duke krijuar mjaft probleme.

Klan News raporton se shumë automjete mbetën nën ujë në rrugën “Albano dhe Romina”, pasi pësuan defekte gjatë tentativës për të kaluar. Nga uji u mbuluan edhe automjetet e parkuara në të dyja anët e rrugës.

Ndërkohë, në të njëjtën rrugë u desh ndërhyrja e zjarrfikësve për të nxjerrë nga një farmaci pronarët e saj, të cilët kishin mbetur të bllokuar brenda.

Meteorologët thonë se moti i keq do të vazhdojë deri në mesnatë ndërsa të shtunën do të ketë një përmirësim të lehtë. Të dielën do rinisin reshjet e shumta shiut.