Prokurimet/ ARRSH, 7 milionë euro për rrugën e vjetër Fier-Vlorë. SHISH, 5 milionë lekë bojë printeri. “Kastrati” humb një tender në Mallakastër

4 muaj, 2 javë më parë - 18 Maj 2022, Gazeta Shqiptare
Prokurimet/ ARRSH, 7 milionë euro për rrugën e vjetër Fier-Vlorë. SHISH, 5 milionë lekë bojë printeri. “Kastrati” humb një tender në Mallakastër
Agjencia e Prokurimit Publik ka publikuar buletinin e ri me tenderat e shpallur nga institucionet qendrore dhe vendore.

Tenderët variojnë që nga ato me shumë të ulëta si “blerje printeri” nga Shërbimi Informativ e deri tek 7 milionë eurot për rehalibitimin e rrugës së vjetër Fier-Vlorë.

Se për çfarë duhen shpenzuar 7 milionë euro për rehabilitimin e një rruge që tani nuk i shërben askujt, përpos disa fshatrave kjo është vështirë të kuptohet.

“Fondi limit në lek: 833,288,437.25 lek pa TVSH. Në Euro: 6,908,949.82 EUR pa TVSH. Kohëzgjatja e kontratës/marrëveshjes kuadër ose afati për zbatimin e saj: 14 muaj”, thuhet në dokumentet e Autoritetit Rrugor Shqiptar.

Një tjetër tender është ai i Agjencisë Kombëtare të Shoqërisë së Informacionit (AKSHI) e cila po merret me dixhitalizimin e shërbimeve të administratës ndaj klientëve. Sipas urdhrit të Edi Ramës që nga data 1 maj nuk do të ketë më sportele, por çdoo veprim do të kryhet on-line. Kjo ka sjellë kaos në funksionimin e disa institucioneve, por nga ana tjetër kjo situatë nuk e ka frenuar AKSHI-n të vazhdojë punën me tenderat. Ky i fundit është rreth 1 milionë euro, për mirëmbajtjen e sistemit.

Gjithashtu, Shërbimi Informativ Shtetëror ka hapur tender për blerje toneri, ose bojë printerash në shumën 5.3 milionë lekë të reja pa TVSH.

Në buletin gjendet edhe tendera “të çuditshëm” si ai 20 milionë lekë të reja për një demontim vinçi në hidrocentralin e Vaut të Dejës ose ai për pjesë makinash të bashkisë Gramsh në shumën 9 milionë lekë të reja.

Gjithashtu, interesant është fakti që kompania “Kastrati” ka humbur një tender për blerje karburanti të shpallur nga bashkia e Mallakastrës.

Support Ukraine