Një tjetër koncesion i ri… Qeveria ia jep privatit kontrollet e karburanteve

24 Qershor 2018 - Gazeta Shqiptare

Illustration

Një tjetër koncesion, apo siç njihen ndryshe PPP. Qeveria shqiptare ka miratuar një koncesion të ri në fushën e shpërndarjes së karburanteve.

Pas markimit tyre, në duart e privatit pritet të kalojë edhe kolaudimi i pompave të karburanteve.

Aktualisht ky shërbim kryhet nga Drejtoria e Përgjithshme e Metrologjisë, një institucion në varësi të Ministrisë së Financave. Referuar vendimit të qeverisë, procedura e kolaudimit të pompave do t'i kalojë një kompanie private për një periudhe 20 vjeçare.

Në mbledhjen e së mërkurës qeveria i ka dhënë dhe një bonus prej 10 pikësh kompanisë Noa Control, e cila ka propozuar koncensionin në fjalë. Bonusi i jep avantazh në tender kompanisë që është vetofruar për të marrë përsipër kontrollin e pompave të karburanteve.

Noa Control është krijuar 3 vite me parë dhe sipas ekstraktit të qendrës kombëtare të biznesit është në pronësi të Gentian Sulës. Aktualisht, Drejtoria e Metrologjisë kolaudon dy herë në vit pompat në pikat e karburanteve për të kontrolluar peshën dhe disa elemente të sigurisë së karburanteve.

Kompanitë që marrin shërbimin e saj duhet të paguajnë një tarifë shërbimi prej 7 mijë lekësh të reja. Në total shërbimi gjeneron 2.5 milionë euro të ardhura vjetore. Ende nuk është e qartë se cili do të jetë ndikimi i këtij shërbimi në çmimin e karburanteve në Shqipëri i cili është ndër më të lartit në rajon.

Emri i Gentian Sulës u përmend dhe në koncesionin e famshëm të targave me çip. Në vitin 2016, sipërmarrësja Fitnete Sulaj, presidente edhe e një shoqate për Sigurinë Rrugore, i kërkon ministrisë së Transporteve koncesionin e targave me çip-një projekt 35 vjeçar që do t'i kushtonte të paktën 48 euro çdo drejtuesi makine, ndërsa ngrinte pikëpyetje për cënimin e privatësisë.

Në atë kohë, Porta Saber Albania ishte kompania e themeluar më 20 prill 2015 që donte të merrte këtë koncesion.
Kompania administrohej nga Fitnete Sulaj, sipërmarrëse e hershme në fushën e Sigurimeve.

Kompania zotërohej në 80 për qind të aksioneve nga Gentian Sula, djali i administratores, ndërsa 20 për qind të aksioneve i kishte kompania portugeze Porta Saber.

Shiteni Makinën Tuaj