Nga sot ndalohet qarkullimi natën, gjobë dhe mbyllje biznesi për shkelësit

Kështu, sipas urdhrit të firmosur nga ministrja e Shëndetësisë, Ogerta Manastirliu, të gjithë ata që nuk kanë punë apo emergjencë duhet të rrinë brenda në shtëpi nga ora 22:00 deri në orën 6:00.

Kategoritë që bëjnë përjashtim janë ata që u duhet të lëvizin për arsye pune ose emergjenca të ndryshme. Këta persona duhet të kenë marrë më parë leje në “e-albania”. Përjashtim nga ky rregull bën vetëm personeli shëndetësor, i cili vetëm pasi e dokumenton këtë gjë, mund të lëvizë lirisht.

Në rast shkeljeje të këtij urdhri, qytetarët gjobiten me 10 mijë lekë gjobë, e nëse kapen në shkelje duke lëvizur me automjet, ai do t’ju bllokohet për tre muaj.

Kufizimi në fashën orare 22:00-6:00, prek jo vetëm individët por edhe baret dhe restorantet të cilët duhet të mbyllin aktivitetin gjatë këtyre orareve, me përjashtim të shërbimit delivery.

Për ata që nuk binden, parashikohet gjobë nga 500 mijë në 1 milion lekë. Përsëritësve të shkeljeve u hiqet mundësia për të ushtruar aktivitetin për gjashtë muaj.