Makinat e vjetra në Shqipëri problemi kryesor i mjedisit

20 për qind e tyre janë importuar gjatë 3 viteve të fundit, kryesisht nga Gjermania e Italia, që do të thotë se shqiptarët shtuan blerjen e makinave gjatë pandemisë.

73 për qind e tyre punojnë me naftë, ndërsa makinat që përdorin benzinë janë 4 herë më pak. Makinat që mbizotërojnë janë ato të para vitit 2005.

Një makinë me karburant prodhon mbi 560 gramë CO2 për kilometër. Të gjithë makinat e Shqipërisë të marra bashkë, prodhojnë 398 ton dioksid karboni. Një ton dioksid karboni është i barabartë me një top gjigand me diametër 10 metër.

Specialistja e Agjencisë së Mbrojtjes së Mjedisit, Ernisa Caka thotë se ndotësit kryesor në Shqipëri janë makinat.

Pavarësisht markave të shtrenjta, mbi 60% e makinave që qarkullojnë në vend, janë prodhuar para vitit 2005. Vetëm 4% janë prodhuar në 7 vitet e fundit. Ndër to as 1% nuk janë elektrike.

Janë kryesisht kompanitë e mëdha apo të taksive ato që kanë futur në vend makinat elektrike. Sara Shehu, menaxhere shitjesh, përdor një të tillë.

“E karikoj një herë në javë dhe eci mbi 200 km,” – tregoi Sara.

Karikuesit në rrugë funksionojnë kryesisht me kartën e kompanisë që i ka vendosur. Ato publikë janë të paktë dhe të përqendruar kryesisht në Tiranë.

Bashkimi Europian synon të ndalojë shitjet e makinave me karburant deri në vitin 2035 duke nxitur prodhimin edhe përdorimin e  makinave elektrike. Ndërkohë që shitja e tyre shënoi rekord vitin e shkuar.