Makina përplasi për vdekje dy kushërinjtë, flet i mbijetuari: Makina ishte me 130 km në orë, dëgjuam…

Ngjarja e rëndë ka ndodhur në fshatin Arapaj të Fierit. Burime për "Gazetën Shqiptare" bëjnë të ditur se një makinë ka përplasur dy këmbësorët djem xhaxhallaësh, të cilët ndërruan jetë. Viktimat janë Amarildo Dogani dhe Festim Dogani, përkatësisht 29 dhe 21 vjeç. Dyshohet se drejtuesi i mjetit që ka përplasur dy viktimat ka qenë me shpejtësi.

Amarildo Çalamani, drejtuesi i mjetit që shkaktoi aksidentin e rëndë është ndaluar nga policia.

I mbijetuari i vetëm u aksidentit  të rëndë të ndodhur mbrëmjen e së dielës në Fier, Martin Dogani, ka treguar për Gazeta Shqiptare se si ka ndodhur përplasja. Ai ka treguar se ishin katër djem xhaxhallarësh, ku pasi kishin pirë një kafe kishin dalë në trotuar.

"Ishim 4 djem xhaxhallarësh. Kishim pirë kafe dhe po rrinim në trotuar. Dëgjuam një zhurmë të madhe frenimi. Pashë djemtë e xhaxhallarëve që makina i përplasi matanë. Më pas, më përplasi dhe mua në mur. Mbeta pa ndjenja.

Drejtuesi i automjetit që shkaktoi aksidentin ka qenë një shok shkolle. Ai nuk ka dashur ta bënte aksidentin. Ishte djalë shumë i mirë. Por mosha, besoj se ishte me 120- 130 km/ orë. Bëri një frenim të fortë"

Automjeti humbi kontrollin dhe doli nga rruga duke i përplasur djemtë e xhaxhallarëve në anë të saj dhe më pas përfundoi në kanal. Makina tip "Volkswagen", drejtohej nga Amarildo Çalamani, i cili u largua nga vendngjarja menjëherë pas aksidentit për tu kapur vetëm pak minuta më vonë nga policia.