Javën tjetër prezantohen tarifat e reja për Rrugën e Kombit

4 Qershor 2018 - Gazeta Shqiptare

Javën tjetër prezantohen tarifat e reja për Rrugën e Kombit

Diskutimet e qeverisë me koncesionarin për tarifën e kalimit në Rrugën e Kombit janë drejt fundit, ndërsa tarifat që do të aplikohen pritet të prezantohen nga kryeministri brenda javës tjetër.

Mësohet se për banorët e zonës do ketë një tarifë të reduktuar, por për kreun e Bashkisë Kukës, kjo zgji-dhje është e papranueshme. Bashkim Shehu shprehet se nuk janë pjesë e negociatave dhe kërkojnë që tarifa për banorët e zonës të jetë patjetër zero. Qeveria duket se ka arritur një marrëveshje me koncesionarin në lidhje me tarifat që do të aplikohen në Rrugën e Kombit për banorët e zonës. Edhe pse nuk ka ende shifra konkrete, banorët lokalë janë kategoria që do të përfitojnë ulje të tarifës, e cila do të mbulohet më pas nga buxheti i shtetit. Kreu i Bashkisë Kukës, Bashkim Shehu deklaron se nuk dinë asgjë në lidhje me negociatat, pasi nuk kanë qenë pjesë dhe nuk u është marrë mendim.

Shehu thekson se kërkesa e Bashkisë së Kukësit është e pandryshueshme, që për banorët e zonës tarifa të jetë zero. Aktualisht në terminalin e dëmtuar në Rrugën e Kombit vijojnë punimet, të cilat pritet të përfundojnë së shpejti. Tarifa e Rrugës së Kombit u pezullua pas protestës së dhunshme, që u zhvillua rreth një muaj më parë ku pothuajse u shkatërrua e gjithë pika e kalimit. Aktualisht kalimi në Rrugën e Kombit po bëhet pa pagesë, ndërsa është konstatuar një rritje e fluksit duke qenë se është periudhë vere dhe ka shumë pushues që vijnë nga Kosova.

Tarifa

Javën që vjen qeveria do të paraqesë formën e re të pagesës së taksës së kalimit në rrugë, e cila do të ketë lehtësi veçanërisht për banorët e zonës dhe për përdoruesit e shpeshtë të rrugës. Pas protestës së dhunshme, qeveria nisi bisedimet si me koncesionarin, ashtu edhe me banorët për të gjetur një zgjidhje. Detajet e formës së re ende nuk janë bërë të ditura, por ato do të mësohen shpejt, kur kalimi në "Rrugën e Kombit" të rinisë me pagesë. Këto ditë, në fakt fluksi nuk ka qenë shumë i lartë, siç ndodh në çdo fillim sezoni veror, por pas përfundimit të muajit të Ramazanit pritet që banorët e qyteteve dhe fshatrave të Kosovës të nisin të lëvizin për pushime apo edhe për fundjavë drejt plazheve të Shqipërisë. Për të parë se si po ecën procesi i punës edhe në pikat e kalimit kufitar mes Shqipërisë dhe Kosovës, ambasadori shqiptar në Kosovë dhe ministri i Brendshëm i Kosovës bënë një inspektim. Gjatë sezonit veror, në pikën e kufirit të Morinit ka fluks të shtuar të lëvizjeve. Në fundjavë krijohen edhe radhë shu-më të gjata.

Shiteni Makinën Tuaj