Importi i makinave të përdorura, qeveria shtyn afatin

Në një konferencë për shtyp, ministrja e Infrastrukturës dhe Energjetikës Belinda Balluku tha se pas konsultimeve, afati i importit të këtyre makinave shtyhet deri në 31 dhjetor 2019.

"Kërkesat për këto ndryshime kanë ardhur fillimisht nga qytetarët përmes platformës së bashkëqeverisjes shqipëriaqëduam.al. Ministria e Infrastrukturës shqyrtoi pretendimet e grupeve të interesit dhe vendosi shtyrjen e afatit për të hyrë në fuqi vendimi nga 28 shkurti 2019 deri në 31 Dhjetor 2019. Me ndryshimin e bërë sot bëhet e mundur zhdoganimi i të gjitha automjeteve", tha Balluku.

Vendimi për të ndaluar importin e makinave më të vjetra se dhjetë vjet u trumbetua nga qeveria si një masë, e cila do të ulte ndjeshëm ndotjen e ambientit.

Vetë kryeministri Rama përmes një videopostimi në Facebook, pati informuar publikun se 80 për qind e automjeteve në Shqipëri janë me certifikatë euro 3, me moshë të vjetër prodhimi dhe shkaktojnë 3 herë më shumë ndotje nga niveli normal. Aktualisht mosha mesatare e automjeteve që qarkullojnë në rrugët e Shqipërisë është ndër më të lartat në Europë, rreth 20 vjet.