“Nëna 154”, kjo është gomonia e fuqishme që përplasi për vdekje fëmijën në plazhin e Potamit

Fëmija ndodhej në jug të vendit, pasi së bashku me familjen e saj me origjinë nga Tropoja kishin lënë Anglinë ku jetojnë për disa ditë pushimesh në vendlindje.

Ndërkohë detaje të reja janë zbuluar për gomonen e fuqishme, helika e së cilës dyshohet se i solli goditjen vdekjeprurëse vogëlushes.

Mjeti lundrues posedon dy motorë (2 x 300 hp) dhe është rreth 7 metra e gjatë. Gomonia mban emrin “Nëna 154”.

Ajo ndodhet akoma në bregun e detit ku ndodhi përplasja fatale, ndërsa policia është duke kryer ekspertizën dhe ka rrethuar zonën e plazhit, që tashmë është boshatisur nga pushuesit.

“Mjaft arrogancës në Policinë e Shtetit”! Meta reagon pas vdekjes tragjike të së miturës në Himarë: Duhet hetim i thelluar dhe i menjëhershëm

Ngjarja tragjike sot në qytetin e Himarës, ka prekur një pjesë të madhe te opinionit publik dhe të zyrtarëve ta lartë të vendit. Kjo reflektohet në reagimet në rrjetet sociale dhe në media.

Kryetari i Partisë së Lirisë, Ilir Meta ka folur me tone të ashpra për këtë ngjarje të trishtë, ku mbeti e vdekur një vajzë 7 vjeçe.

Meta kërkon një hetim të thelluar dhe të menjëhershëm.

Reagimi i plotë

Thellësisht i tronditur nga ngjarja tragjike në plazhin e Himarës, ku zyrtari i lartë i Policisë së Elbasanit A.T i mori sot jetën një vajze të mitur 7-vjeçare, e cila kishte ardhur me familjen për pushime në Shqipëri.

Duke ju shprehur ngushëllimet më të ndjera familjes dhe të afërmve për humbjen e vogëlushes së tyre të shtrenjtë, dënoj me forcën më të madhe situatën katastrofike të sigurisë publike në plazhe, në pikun e sezonit turistik, fatkeqësisht me pasoja kaq tragjike të përsëritura.

Hetim i menjëhershëm i thelluar dhe ndëshkim të ashpër për shkeljen e ligjit nga drejtuesit e Policisë së Shtetit!

Mjaft arrogancës dhe papërgjegjshmërisë në Policinë e Shtetit!

Babai i vogëlushes iu vërsul policit që ia vrau vajzën me skaf, pastaj ra në gjunjë nga tronditja

Një ngjarje e rëndë është regjistruar këtë të martë në jug të Shqipërisë, ku një familje e cila kishte ardhur për të kaluar pushimet në vendlindje u përball me një tragjedi për shkak të pakujdesisë së një zyrtari të Policisë së Shtetit.

Fotot që shihni tregojnë momentin e përplasjes së babait që humbi 7-vjeçaren në mënyrë tragjike dhe të drejtuesit të gomones Arjan Tase që goditi vajzën e vogël.

Gjithashtu në një tjetër foto duket edhe momenti dramatik kur babai i vajzës së ndjerë ka rënë në tokë me dy duar në kokë, i tronditur nga humbja e vajzës.

Sipas informacioneve nga vendngjarja, dëshmitarët janë shprehur se drejtuesi i gomones, ka qëndruar indiferent,  por edhe i është kthyer ashpër prindërve të vajzës që humbi jetën.

Gledis Nano përjashton nga policia komisarin që i mori jetën me skaf 7-vjeçares në Himarë

Drejtori i Përgjithshëm i Policisë së Shtetit, Gledis Nano ka reaguar në lidhje me ngjarjen e rëndë të ndodhur mesditën e sotme, në Potam, Himarë, ku humbi jetën një fëmijë 7 vjeç, si pasojë e goditjes nga një mjet lundrues që drejtohej nga një oficer policie.

Reagimi i plotë

Reagim i Drejtorit të Përgjithshëm të Policisë së Shtetit, në lidhje me ngjarjen e ndodhur mesditën e sotme, në Potam, Himarë, ku humbi jetën një fëmijë 7 vjeç, si pasojë e goditjes nga një mjet lundrues që drejtohej nga një oficer policie.

Drejtori i Përgjithshëm i Policisë së Shtetit Gledis Nano i shpreh ngushëllimet e sinqerta familjes Avdia, për humbjen e jetës së vajzës së tyre 7-vjeçare, e cila u godit nga një mjet lundrues. Për Policinë e Shtetit keqardhja dhe përgjegjësia për këtë ngjarje është e dyfishtë, përveç se në nivel institucional, ashtu edhe në atë njerëzor, si prindër, si familjarë dhe si bashkëqytetarë të këtij vendi.

Ndërkohë, Drejtor Nano ka përjashtuar nga radhët e Policisë së Shtetit oficerin e Policisë Komisar Arjan Tase, me detyrë Shef Seksioni i Policimit në Komunitet në Komisariatin e Policisë Elbasan, i cili është arrestuar menjëherë pasi ka ndodhur ngjarja. Oficeri i Policisë ndodhej me pushime në Himarë dhe duke drejtuar një mjet lundrues skaf, dyshohet se ka humbur kontrollin mbi drejtimin e mjetit dhe për pasojë mjeti lundrues ka goditur vajzën 7-vjeçare të familjes Avdia, e cila për shkak të plagëve të marra ndërroi jetë në vendngjarje.

Gjithashtu, Drejtori i Përgjithshëm i Policisë së Shtetit Gledis Nano ka pezulluar nga detyra, deri në zbardhjen e plotë të rrethanave të ngjarjes, Drejtorin e Drejtorisë Vendore për Kufirin dhe Migracionin Vlorë, Kryekomisar Shpëtim Hasanaliaj.

Njëkohësisht, Drejtor Nano ka urdhëruar Drejtorinë e Standardeve Profesionale, Departamentin për Kufirin dhe Migracionin dhe Departamentin për Rendin dhe Sigurinë Publike, për ngritjen e një grupi të posaçëm, për të verifikuar zbatimin e porosive të dhëna së fundi nga Drejtori i Përgjithshëm i Policisë së Shtetit, për shtimin e masave të sigurisë në zonat bregdetare.

Drejtori i Përgjithshëm i Policisë së Shtetit shpreh mbështetje dhe inkurajon grupin hetimor të Agjencisë së Mbikëqyrjes Policore, i cili nën drejtimin e Prokurorisë pranë Gjykatës së Rrethit Gjyqësor Vlorë, vijon punën për zbardhjen e plotë të rrethanave të kësaj ngjarjeje.