Aksident i rëndë në Gramsh, kamioni del nga rruga dhe bie në humnerë! Infermierja një prej viktimave, mësuesja dhe shoferi…

Sipas informacioneve paraprake, një mjet tip kamionçinë ka dalë nga rruga dhe ka rënë në humnerë, duke shkaktuar pasoja fatale.

Gazetari Fatmir Popja informon se në mjet udhëtonin tre persona, pjesë e personelit të shërbimit në fshatra: një mësuese, një infermiere dhe drejtuesi i mjetit.

Sipas hetimeve paraprake që janë ende në proces e sipër nga Policia Rrugore dhe autoritetet vendore, në automjetin e përfshirë në aksident mendohet se ndodheshin Dëshira Hoxha, 43 vjeçe dhe Albana Boja, 40 vjeçe.

Gazetari Popja raporton se Dëshira Hoxha është viktima, infermiere. Brenda në mjet ka qenë edhe i aksidentuari Shaban Kotorri, shoferi 38-vjeçar, i plagosur rëndë, si dhe mësuesja Albana Boja, po e plagosur.

Albana Boja, mësuesja, është nxjerrë nga mjeti dhe nisur drejt spitalit pas ngjarjes. Pas mjekimit në spitalin Rajonal, ajo u dërgua drejt Traumës në Tiranë.

Burime nga vendngjarja bëjnë me dije se drejtuesi i mjetit, i cili ishte në gjendje të komunikonte, është lidhur me sallën operative të policisë dhe ka raportuar se mësuesja dhe infermierja kishin ndërruar jetë, ç’ka solli edhe konfuzionin fillestar në informacionet paraprake.

Forcat e policisë dhe shërbimet e emergjencës kanë mbërritur menjëherë në vendngjarje, duke kryer veprimet e nevojshme dhe duke nisur hetimet për zbardhjen e shkaqeve të aksidentit.

Paraprakisht dyshohet se rruga e vështirë dhe kushtet e terrenit mund të kenë ndikuar në humbjen e kontrollit të mjetit.

Mbeten të paqarta rrethanat e këtij aksidenti dhe vetëm ekspertiza autoteknike do të zbardhin shkakun e ngjarjes së rëndë.