Dritë në tunelin e Murrizit/ Përfundojnë gërmimet, punimet mbyllen në 2024

Kryeministri Edi Rama inspektoi sot në terren ecurinë e punës për tunelin e Murrizit, ku përfundoi procesi i gërmimit dhe dalja e dritës nga bashkimi i dy anëve të kantierit ishte çasti më i shumëpritur i një pune të tejet sfiduese.

“Ndodhemi në tunelin kryesor të Murrizit. Një tunel i përbërë nga dy tuba. Ndodhemi në tubin kryesor, ndërkohë që tubi tjetër është tubi ndihmës, lidhen me njëri tjetrin me 11 nyje lidhëse, 3 prej të cilave janë më të gjëra dhe kanë mundësi shkëmbimi. Gjatësia e këtij tuneli është 3789 metra, ndërkohë e tunelit ndihmës 3781 metra. Lartësia këtu është 6.8 metra, ndërkohë që tuneli ndihmës është 4.2 metra. Ka qenë një vepër me infrastrukturë jashtëzakonisht sfiduese. E kemi nisur këtë tunel në maj të vitit 2019, ndërkohë tunelin ndihmës e kemi nisur në korrik të 2019. Na është dashur të përballemi me shumë sfida, pasi gjeologjia është totalisht e paqëndrueshme dhe volumet e kërkimit kanë qenë të mëdha.

Janë përdorur më shumë se 26 ton hekur, pasi ka qenë shumë e nevojshme që të strukturoren në mënyrë të tillë për të qëndruar. Ka patur një angazhim shumë të madh nga të gjitha grupet që kanë qenë duke punuar. Kemi patur katër fronte që kanë qenë duke punuar dhe nga përllogaritje na janë dashur më shumë se 1400 ditë për tunelin e vogël dhe më shumë se 1600 ditë për këtë tunel.

Sot jemi në fazën finale praktikisht. Kemi nisur nga e premtja e shkuar që të shohim dritë nga ana tjetër dhe sot është përfundimi dhe këtu hapen dhe mbarojmë përfundimisht gërmimet.” – detajoi Zëvendëskryeministrja Balluku.

Nga ana e tij, Kryeministri Rama vlerësoi punën me ritme të përshpejtuara dhe vuri theksin tek cilësia e punimeve. “Ishte një shenjë e mirë që u hap para se të mbarojë viti se këtë ne nuk e prisnim. Ishte përshpejtim! Thjeshtë ta mbarojmë me kulmin e cilësisë, pastaj kur të mbarojë të mbarojë. Brenda viti tjetër s’diskutohet, por le t’ia lëmë dhe pak fatit këtu se këtu çfarë s’kemi parë. Tani gjithësi është më në kontroll puna”. –u shpreh kryeministri Rama.

Pas më shumë se 4 vitesh, hapet tuneli i Murrizit në Rrugën e Arbrit 

Pas më shumë se 4 vitesh është hapur tuneli i Murrizit. Kryeministri Edi Rama ishte në terren ku pa nga afër finalizimin e ndërtimit të tunelit të Murrizit në Rrugën e Arbrit.  

Tashmë janë bashkuar të dyja anët e tunelit pas gërmimesh intensive në kushte të vështira gjeologjike me vetëm 2 metra avancim në ditë.  

Fundjavën e shkuar u bë i mundur bashkimi i të dy anëve të kantiereve. 

“Gjatësia e këtij tuneli është 3789 metra. Për të thënë të drejtën, ka qenë një vepër infrastrukturore jashtëzakonisht sfiduese pasi gjeologjia ka qenë totalisht e paqëndrushme”, tha ministrja Balluku. 

Por edhe pse punimet kanë zgjatur shumë më shumë se sa ishin parashikimet për shkak të gjeologjisë që karakterizon zonën ku u planifikua tuneli, ministrja Belinda Balluku garanton se nuk ka asnjë qindarkë shtesë nga kontrata fillestare. 

“Janë thënë shumë për kosto ekstra, për kosto të fshehura. Ne nuk kemi pasur asnjë kosto tjetër”, shprehet Balluku. 

Edhe Rama dhe Balluku flasin për të mirat e partneritetit me kompaninë private në këtë projekt që sipas tyre nëse do të ishte bërë krejtësisht me paratë e buxhetit të shtetit, kostot do të rëndonin shumë. 

“I ngeli kostoja kompanisë, por nëse ne këtë nuk do e kishim bërë me PPP por do e kishim bërë me buxhet shteti, këtu nuk dilej nga tuneli për nja 15 vjet”, u shpreh Kryeministri Edi Rama. 

Përfaqësuesi i kompanisë Gjoka që po ndërton këtë rrugë, jep 2024-ën si afatin e përfundimit të punimeve. 

Tuneli i Murrizit është segmenti i fundit i papërfunduar i Rrugës së Arbrit, pjesa tjetër është hapur për qarkullimin e automjeteve më 28 Nëntor të 2021.