Mes të shoqëruarve ishte edhe Plarent Dervishi dhe Julian Meçe, si persona që mund të kenë dijeni për atentatin e kryer pasditen e së premtes pranë mbikalimit te Shkozetit.
Mbledhja e dëshmive po bëhet paralelisht me ekspertizën që po i bëhet makinës së autorëve të krimit, një “Benz” ngjyrë gri që rezulton të jetë i vjedhur së bashku me targat që mbarte. Shpresat për të arritur tek identifikimi janë të mëdha, pasi veç kallashnikovëve, në mjet u gjetën edhe maskat, tek të cilat mund të ketë material që do i nënshtrohet analizave të ADN-së.
Dy të plagosurit e atentatit të së premtes, prokurori Arjan Ndoja dhe Aleksandër Laho, i njohur me pseudonimin “Rrumi” vazhdojnë të qëndrojnë në spitalin e Durrësit që nga mbrëmja e së premtes.
Prokurori Arjan Ndoja ka një plagë në shpatull, ndërsa Aleksandër Laho që ka mbajtur edhe emrin Land Muharremi, po qëndron në pavionin e kirurgjisë. Dëmtimi që i është shkaktuar nga një plumb i vetëm, ka depërtuar nga shpatulla në drejtim të nofullës dhe është më i rëndë. Ndërkohë në Tiranë, gjendja e shoferit Andi Maloku është stabel por mjeket ende nuk japin garanci për jetën.
Ardi Veliu mbledh drejtuesit e policisë
Drejtori i Përgjithshëm i Policisë, Ardi Veliu ka mbledhur këtë të diel strukturat drejtuese të policisë. Veliu ka kërkuar informacion në lidhje me ecurinë e deritanishme të punës për zbardhjen e të gjitha provave në dy automjetet e ngjarjes në fjalë dhe punën për identifikimin e autorëve të ngjarjes. Atentati është duke u hetuar nga prokurorët e Krimeve të Rënda, Anton Martini dhe Besim Hajdarmataj.
Makina e gjetur, u përdor si karrem?
Makina që dyshohet se u përdor nga autorët u gjet e braktisur në fshatin Shkafan pranë Ishmit. Hetuesit dyshojnë se ky automjet mund të jetë “karrem” për të shpërqendruar punën e grupit hetimor. Në të shumtën e rasteve në ngjarje të tilla autorët pas krimit e djegin makinën për të humbur gjurmët. Kjo është një metodë mjaft e përdorur në ngjarjet kriminale. Mirëpo, në atentatin që iu bë prokurorit Ndoj pasditen e së premtes nuk u përdor kjo metodë. Makina që u gjet e braktisur brenda së cilës kishte edhe armë e maska nuk u dogj. Nga ana tjetër, grupi hetimor po e mban mjaft të fshehtë se kujt i përket makina e braktisur. Dyshimet janë se ka patur edhe një makinë të dytë. Kjo e fundit mund të ketë porositur atentatin. Kamerat e sigurisë kanë arritur të kapin makinën në fjalë e cila është parë disa herë pranë vendit të ngjarjes. Ndërkohë, kamerat nuk kanë mundur të fiksojnë momentin kur ndodhi atentati.
Targa e makinës së atentatit ndaj prokurorit iu vodh një vajze
Targat “AA 342 LM”, me të cilat u kamuflua makina tip “Mercedez Benz” e përdorur për atentatin ndaj prokurorit Arjan Ndoja në mbikalimin e Sukthit në autostradën Durrës-Tiranë janë denoncuar të vjedhura në Tiranë një javë para ngjarjes. Ato i përkasin një veture “Nissan” në pronësi të V.Gj. e cila kur ka dalë një javë më parë në mëngjes të përdorë makinën e saj e ka gjetur atë pa targa. Policia ka nisur hetimet por nuk ka mundur të gjejë autorët e vjedhjes së kësaj targe e cila ka qenë pjesë e planit të atentatit të mirë organizuar më herët.
