ARRSH thirrje shoferëve: Kujdes! Udhëtoni me zinxhir në këto zona

1 javë, 5 ditë më parë - 19 Janar 2023, opinion
ARRSH thirrje shoferëve: Kujdes! Udhëtoni me zinxhir në këto zona
Teksa vijojnë rreshjet e shiut ndërsa në zonat malore priten rreshje dëbore, Autoriteti Rrugor Shqiptar u ka bërë thirrje drejtuesve të mjeteve për kujdes të shtuar gjatë udhëtimeve në zonat malore.

Përmes një njoftimi në “Facebook”, ARRSH apelon që drejtuesit e mjeteve të ulin shpejtësinë, të respektojnë sinjalistikën dhe të pajisen me goma dimërore.

Reshjet e shiut dhe të dëborës në Bogë-Theth, kanë vazhduar gjatë natës deri në orët e para të mëngjesit, pa sjellë probleme me qarkullimin pasi kontraktorët me mjete e punëtorë kanë qenë në terren gjatë gjithë natës për të mbajtur qarkullimin në normalitet.

Tregoni kujdes të shtuar gjatë drejtimit të mjetit në kohë me reshje, pajisuni me goma dimërore dhe zinxhirë kur udhëtoni për në zonat malore, ulni shpejtësinë, respektoni sinjalistikën dhe udhëzimet e Policisë Rrugore”- njofton ARRSH.

Familja me 5 anëtarë rrezikon jetën duke kaluar përroin me makinë

Një familje me 5 anëtarë është shpëtuar pasi mbeti e bllokuar brenda makinës së tyre në një përrua në fshatin Kaluer të Njësisë Administrative Ungrej në Lezhë.

Mësohet se të pestë anëtarët e familjes po ktheheshin nga një ceremoni mortore dhe tentuan të kalonin përroin me fuoristradë, por për shkak të prurjeve të shumta të ujit, automjeti i tyre mbeti i bllokuar.

Banorët e zonës u kanë ardhur në ndihmë dhe i kanë ndihmuar që të dalin nga automjeti, duke shmangur kështu tragjedinë.

Vendi ynë është përfshirë nga reshje intensive shiu ndërsa sipas njoftimit të Ministrisë së Mbrojtjes në datën 20 Janar do të arrihet piku i prurjeve.

Gjithashtu ministria u ka bërë thirrje qytetarëve në zonat e rrezikuara të bëjnë kujdes me lëvizjet e tyre në orët në vijim, të shmangin kalimet në rrugët me prezencë uji, të respektojnë rregullat e qarkullimit rrugor dhe të njoftojnë strukturat vendore për ndihmë.

Support Ukraine