Aksidenti i trefishtë/ I ndjekur nga policia, i dyshuari rezistoi nga Korça në Elbasan

Dy makina policie, njëra me targa private dhe tjetra me logo policie, ishin vënë në ndjekje të një autoveture tip Volkswagen Pasat me targa greke, e cila kishte refuzuar t'i ndalonte postblloqeve të policisë që në Korçë, duke refuzuar urdhërin e uniformave blu edhe në Pogradec dhe Librazhd, duke vazhduar me shpejtësi në drejtim të Elbasanit.

Dëshmitarët okularë janë shprehur se mes ndjekësve dhe policisë janë kryer manovra të rrezikshme në rrugë dhe nga autovetura Volkswagen janë hedhur në rrugë kunja shpuese, për të shmangur ndjekjen e policisë.

Në hyrje të qytetit të Elbasanit, policia kishte ngritur një postbllok në unazën jugore, ku mjeti Volksëagen ka humbur kontrollin duke u përmbysur dhe duke përplasur edhe dy autovetura të tjera.

Për pasojë, u plagosën 4 persona që ndodheshin në automjetet e tjera dhe mes të plagosurve është edhe një punonjës policie. Ndërsa drejtuesi i mjetit që ndiqej nga policia është arrestuar. Ai është 27-vjeçari Aldiron Shehu, i cili ende nuk dihet se përse kishte refuzuar t'i ndalonte policisë, ndërsa më parë ky shtetas ka patur një tjetër incident të ngjashëm.

Në autoveturën e tij policia nuk ka gjetur asgjë të kundraligjshme, përveç disa targave të automjeteve të tjera.

Ndërkohë, në vendngjarje, përveç uniformave blu ka ardhur edhe vetë drejtuesi i Prokurorisë së Elbasanit, Kreshnik Ajazi, ndërsa është ngritur një grup i posaçëm hetimor për zbardhjen e plotë të kësaj ngjarjeje, e cila fatmirësisht përfundoi vetëm me të plagosur dhe dëme materiale.