Aksident në Tiranë, makina përplas çiftin dhe fëmijën 3 muajsh
Aksident në Tiranë, makina përplas çiftin dhe fëmijën 3 muajsh
Një aksident i rëndë është regjistruar pak më parë në zonën e ish-parkut të Autobusëve në Tiranë.
Mësohet se një makinë ka përplasur 3 persona, dy prindërit dhe një fëmijë të vogël, të cilët kanë mbetur të plagosur dhe janë dërguar në spital.
Ndërkohë, drejtuesi i mjetit është larguar nga vendi i ngjarjes.
“Më datë 08.05.2022, në Rrugën e Kavajës, një mjet me drejtues ende të paidentifikuar, ka përplasur shtetasit V. K., 43 vjeçe, A. K., 48 vjeç dhe fëmijën e tyre të mitur 3 muajsh, të cilët si pasojë janë dëmtuar dhe ndodhen në spital, nën kujdesin e mjekëve.
Drejtues i mjetit ka braktisur mjetin dhe është larguar nga vendi ngjarjes.
Grupi hetimor po punon për kapjen e autorit dhe sqarimin e rrethanave të ngjarjes”, njofton policia.
Karroca e foshnjës në vendngjarje, pamje nga aksidenti i rëndë në Tiranë
Kanë dalë pamjet e aksidentit të ndodhur pak më parë në zonën e ish-parkut të Autobusëve në Tiranë.
Një makinë ka përplasur 3 persona, dy prindërit dhe një fëmijë të vogël, vetëm 3 muajsh.
Sikurse duket në video karroca e foshnjës është në vendngjarje, ndërsa policia ka vendosur shiritin e sigurisë.
Ndërkohë, drejtuesi i mjetit është larguar nga vendi i ngjarjes.
Përplasi çiftin dhe fëmijën e tyre, arrestohet drejtuesi i makinës
Policia ka mundur të arrestojë pas disa orësh drejtuesin e makinës luksoze “G Classi” që përplasi një çift dhe fëmijën e tyre tre muajsh teksa ishin duke kaluar tek vijat e bardha në rrugën e Kavajës në Tiranë.
Sipas informacioneve, 39-vjeçari Ajas Sulejmani në momentin që është arrestuar nga policia ka qënë në ambientet e një spitali provat në Tiranë.
Aktualisht autori i aksidentit të çiftit Vilma dhe Arjan Konomi dhe fëmijës së tyre ndodhet në komisariatin e policisë Nr.2, ku do të merret në pyetje lidhur me dinamikën e ngjarjes.
Të plagosurit janë transportuar në spitalin e Traumës ku ndodhen jashtë rrezikut për jetën. Kanë qenë kalimtarët e rastit që iu dhanë ndihmën e parë të plagosurve, pasi drejtuesi i mjetit, 39-vjeçari Ajas Sulejmani, i përplasi te vijat e bardha dhe i la shtrirë në rrugë duke u larguar me shpejtësi nga vendi i ngjarjes për t’iu shpëtuar forcave të policisë.
Tiranë/ Publikohet videoja, momenti kur makina përplas çiftin dhe fëmijën e tyre
Është publikuar videoja e momentit të aksidentit të ndodhur ditën e sotme në rrugën e Kavajës në Tiranë, ku një makinë “Mercedez G-Class” përplasi një çift dhe foshnjën e tyre teksa po kalonin në vijat e bardha.
Në video shihet se çifti Arjan dhe Vilma Konomi, ndodhen në trotuar në pritje të semaforit, dhe sapo hapet drita jeshile e cila u jep akses kalimtarëve për të kaluar rrugën, burri dhe gruaja bashkë me karrocën e fëmijës nisen të qetë për në anën tjetër të trotuarit, por në mes të rrugës mjeti “Mercedes G-Class” i drejtuar nga 39-vjeçari Ajas Sulejmani i përplas, duke rrëzuar karrocën ndërsa merr para çiftin.
Janë kalimtarët ata të cilët u japin ndihmën e parë të plagosurve ndërsa njoftojnë dhe ambulancën.
Ndërkohë siç shihet edhe në video drejtuesi i mjetit por dhe pasagjeri janë larguar menjëherë në vendngjarje.
Arratisja e dy personave që kanë qenë brenda mjetit luksoz që shkaktoi aksidentin ka zgjatur vetëm pak orë.
Ka qenë fillimisht pasagjeri ai që ka rënë në pranga dhe më pas drejtuesi i mjetit Ajas Sulejmani, i cili ndodhej në ambientet e një spitali privat.
39-vjeçari Ajas Sulejmani ka qenë i shpallur në kërkim nga drejtësia Britanike, pasi akuzohet për trafik droge. Ndërkohë që më herët u raportua se ai gjatë viteve të fundit punonte në Gjermani.
Përplasi çiftin dhe fëmijën e tyre, 39-vjeçari ishte nën efektin e drogës
39-vjeçari Ajas Sulejmani kishte konsumuar drogë para se të përplaste me makinë një çift bashkëshortësh dhe fëmijën e tyre tre muajsh teksa kalonin në vijat e bardha në rrugën e Kavajës në Tiranë.
Policia thotë se pas kryerjes së testit të drogës, Sulejmani ka rezultuar se drejtonte mjetin nën efektin e lëndëve narkotike.
39-vjeçari pasi shkaktoi aksidentin i la shtrirë në rrugë të plagosurit dhe u largua me shpejtësi nga vendi i ngjarjes.
Pak orë më vonë policia e arrestoi atë në ambientet e një spitali privat.
Lajmet përkatëse
