Aksident në aksin Kardhiq-Delvinë, kamioni i mallrave përmbyset në rrugë

Aksidenti ka ndodhur pak më parë, pranë hyrjes së tunelit. Për momentin nuk dihen ende shkaqet dhe rrethanat e ngjarjes.

Në vendngjarje ka mbërritur policia, e cila po punon për menaxhimin e situatës dhe normalizimin e qarkullimit në këtë segment rrugor.

Deri në këto momente nuk ka informacion të konfirmuar për persona të lënduar.

Pritet që në vijim të dalin më shumë detaje për aksidentin dhe shkaqet e tij.

Aksident në Lushnje, makina përplaset me murin dhe përmbyset në rrugë. Plagoset shoferi

Një aksident ka ndodhur në afërsi të rrethrrotullimit të Plykut, në bypass-in e autostradës në Lushnje.

Një automjet tip “Ford” është përplasur me murin rrethues të një biznesi në anë të rrugës. Si pasojë e përplasjes, është rrëzuar edhe një shtyllë ndriçimi, ndërsa më pas automjeti ka përfunduar i përmbysur në njërën anë të rrugës.

Drejtuesi i mjetit ka mbetur i plagosur dhe është transportuar me urgjencë drejt Spitalit të Lushnjës, ku po merr ndihmën mjekësore.

Në vendngjarje ka mbërritur Policia Rrugore, e cila po dokumenton aksidentin dhe po menaxhon qarkullimin e automjeteve. Ndërkohë, grupi i Policisë Shkencore po kryen ekspertizën për të përcaktuar shkaqet dhe rrethanat e aksidentit.

Paraprakisht dyshohet se drejtuesi i automjetit ka qenë duke lëvizur me shpejtësi tej normave të lejuara dhe ka humbur kontrollin mbi mjetin, duke dalë nga rruga dhe u përplasur me objektet në anë të saj.

Tre të vdekur në aksidente/ E mërkurë e përgjakur: Në pak orë, tre përplasje fatale

Tre aksidente të rënda, me tre viktima dhe disa të plagosur, janë shënuar brenda pak orësh mbrëmjen e së mërkurës në disa qytete të vendit. Bilanci më i rëndë u shënua në Dibër, ku një 74-vjeçare humbi jetën dhe gjashtë persona të tjerë mbetën të plagosur pas përplasjes së dy automjeteve.

Aksidenti ndodhi në vendin e quajtur “Shkolla e Dovolanit”, në aksin Peshkopi–Maqellarë. Një “Mercedes” dhe një “Golf 5” u përplasën kokë më kokë, duke shkaktuar vdekjen e 74-vjeçares Xhilape Osmani. Mes gjashtë të plagosurve janë Sildi Osmani, 36 vjeç, Dael Manjani, 18 vjeç dhe Leila Osmani, 30 vjeç, si dhe tre të mitur.

Të plagosurit morën ndihmën e parë në Spitalin Rajonal të Peshkopisë dhe më pas u transportuan drejt Spitalit të Traumës në Tiranë. Gjendja e tyre shëndetësore raportohet e stabilizuar. Vetëm pak orë më pas një tjetër aksident fatal u shënua në Korçë. Një 18-vjeçar humbi jetën pasi u përplas nga një automjet teksa po kalonte rrugën.

I riu nuk mundi t’u mbijetonte plagëve të marra, ndërsa drejtuesi i mjetit u shoqërua në komisariat për t’u marrë në pyetje lidhur me rrethanat e aksidentit. Një tjetër viktimë, këtë herë një fëmijë vetëm 3 vjeç, u shënua në Kurbin.

Vajza humbi jetën tragjikisht në oborrin e banesës, në një incident të ndodhur teksa babai i saj po manovronte me një mjet bujqësor. Tre ngjarjet e rënda u regjistruan brenda pak orësh, duke sjellë një bilanc tragjik në rrugë ndërsa policia vijon hetimet për zbardhjen e plotë të rrethanave të secilit rast.