Zhdukja e biznesmenit turk, itinerari i jahtit ngre 2 pista hetimesh

Jahti i përket një biznesmeni turk i quajtur Sevgin Yavuz. Specialistët e Krimeve të Rënda dhe SHISH kanë nisur hetimet për zhdukjen misterioze tij.

Jahti është ankoruar për herë të fundit në portin e Tivarit në Malin e Zi. Në 2 shtator është larguar prej aty me një destinacion të pa ditur ende. Sinjali i fundit i radarit të tij është regjistruar në orën 17:42 pranë Budvës dhe më pas komunikimi është ndërprerë. Shqipëria nuk ka qenë në itinerarin e jahtit por pasi është fikur dhe pa drejtues, era e ka zhvendosur atë në ujrat shqiptare.

Pistat kryesore të hetuesve janë ngjarje aksidentale ose vrasje për përfshirje në trafik droge. Kjo e fundit dyshohet pasi hetuesit kanë egzaminuar udhëtimin që ka bërë jahti. Së fundmi ai ka lundruar nëpër disa porte italiane dhe më pas në Tivar. Brenda tij janë gjetur disa dokumente, ku mes tyre është edhe pasaporta e biznesmenit turk, dhe disa gjurmë të cilat janë dërguar për analizë në laborator. Një tjetër detaj që ngre dyshime është se jahti ka qenë i mbushur me karburant për një udhëtim shumë më të gjatë se drejt Shqipërisë.

Anija e quajtur ATIKA BEY me targë YM 9896 do ti kthehet familjarëve të Yavuz të cilët janë nisur tashmë drejt Shqipërisë.