Transporti publik në Tiranë, makthi i qytetarëve. Më shpejt në këmbë se me autobusë

 E dyta, të gjithë autobusët sot kanë instaluar një GPS, pra një çip elektronik, i cili na tregon në mënyrë ekzakte se ku ndodhet autobusi, nëse po ecën ngadalë qëllimisht, edhe pse nuk ka trafik, apo nëse ngadalësia ka të bëjë me trafikun.

Kjo deklaratë e kryetarit të Bashkisë së Tiranës është bërë në 6 shkurt 2017, rreth 1 vit pasi Bashkia pranoi kërkesën e kompanive private, të cilat ofrojnë shërbimin e transportit publik me autobusë në Tiranë, për të rritur çmimin e biletës me 10 lekë (nga 30 lekë-40 lekë).

Veliaj gjatë kësaj deklarate kishte zgjedhur linjën e Unazës, për të inspektuar cilësinë e shërbimit. Por kjo video është bërë këtë të enjte, ku duket se si urbani i linjës: Uzina Traktori- Qendër-Instituti Bujqësor ecën me 5 kilometra në orë. Dhe siç duket në video rruga është e hapur, pra nuk ka as trafik.

Me këtë shpejtësi, që lëvizin autobusët e kësaj linje për të shkuar nga Uzina Traktori deri në Institut duhen rreth 60 minuta udhëtim, pasi janë plot 25 stacione.

Dhe për ata që përdorin transportin publik, kjo situatë është e përditshme. Për të mos harruar edhe kushtet brenda autobusëve, apo cilësinë e shërbimit të shoferëve apo fatorinove.

Më 30 dhjetor të vitit 2015, ndërsa shqiptarët përgatiteshin për festimin e vitit të ri, Këshilli Bashkiak i Tiranës miratoi propozimin e kryetarit të Bashkisë Erion Veliaj për rritjen e çmimit të biletës të transportit urban në kryeqytet nga 30 në 40 lekë. Kjo rritje u fut në fuqi në 1 shkurt të vitit 2016. Me rritjen e çmimit të biletës, u rritën edhe abonetë e linjave si dhe ajo e përgjithshme.

Një investigim i BIRN, në janar të 2016 do të tregonte se rritja e biletave të autobusëve ishte jo transparente dhe e paargumentuar. Akoma dhe më tej, drejtuesit e autobusëve urbanë në shumë raste janë bërë burim aksidentesh, pasi janë të dehur në timon. Rasti më i fundit është në 12 mars të këtij viti.

Gjatë kontrollit u konstatua një drejtues autobusi i linjës Tufinë-Qendër i cili drejtonte autobusin në gjendje të dehur, ku testi i parë rezultoi 0.56 mg/l dhe testi i dytë 0.66 mg/l.

Drejtuesi i autobusit Besnik H, 52 vjeç, banues në Tiranë, u arrestua në kushtet e flagrancës për drejtim të mjetit në gjendje të dehur. Për të gjithë këto raste, a ka një përgjigje Bashkia e Tiranës?