Si qëndron e vërteta e hetimeve të SPAK-ut për tunelin e Llogarasë

Hetimi është i vitit 2023, ka lidhje me kreun e ARRSH -së, Evis Berberi, i cili ndodhet në qeli. Hetimet janë thelluar. Një nga kompanitë me të cilat është lidhur vetë Evis Berberi kishte një përqindje të caktuar në kompaninë supervizore të tunelit të Llogarasë. Pra kemi të bëjmë me kompaninë e supervizimit në Llogara.

Prokurorët e SPAK-ut kanë kërkuar dokumentet nga kompania, pasi ortaku i Evis Berberit kishte rreth 30% pjesë të aksioneve të kontratës që do të bënte supervizimin e tunelit të Llogarasë. Kjo për shkak se bashkimi i operatorëve ekonomikë, “Hill Internacional N.V” dhe kompania “Net Group” e Valter Begajt, kanë fituar tenderin pranë Ministrisë së Infrastrukturës dhe Energjisë për mbikëqyrjen e punimeve për tunelin e Llogarasë.

Prokurorët e Posaçëm kanë ngritur dyshime se tenderi mund të jetë paracaktuar dhe kompanitë e tjera, janë skualifikuar padrejtësisht, për shkak të lidhjes mes Berberit dhe Valter Begajt. Nga hetimet e deritanishme, SPAK -u e akuzon ish-kreun e ARRSH -së, Berberi, se favorizonte mikun e tij Begaj në tenderë përmes një kompanie që ai kontrollonte në mënyrë të tërthortë.

Pra, e gjithë e vërteta është se prokurori i SPAK -ut, Dritan Prençi, i cili ka dhe dosjen e ish-drejtorit të ARRSH -së, Evis Berberi, po vazhdon hetimet dhe plotësimin e dosjes me dokumente, fakte dhe prova, për të cilat sot ka qenë data e dorëzimit të tyre.

Prokurorët e SPAK -ut kanë pasur një sasi dokumentesh dhe i kanë kërkuar kompanisë të sillte dhe pjesën tjetër të tyre. Tashmë kuptohet, në media ka plasur zhurma sikur në fakt po bëhet nami, por është një dosje dhe ekzaktësisht e vërteta qëndron siç CNA po e raporton.