Policia rrugore në aksion/ Pezullohen 34 leje drejtimi, arrestohen 7 persona, një tentoi të korruptojë oficerin me 5 mijë lekë

4 Shtator 2021 - Gazeta Shqiptare

Illustration

6 persona të vënë në pranga, 34 leje qarkullimi të pezulluara dhe 1554 drejtues mjetesh të ndëshkuar me masë administrative. Ky është bilanci i operacionit të krijuar nga policia rrugre gjatë ditës së sotme në vend.

Nga sa behet e ditur nga 6 personat e arrestuar, 3 ishin të dehur në timon, ndërsa 3 të tjerë ishin pa leje drejtimi. Ndërsa nga 34 lejet e drejtimit të pezulluara, 19 ishin për shpejtësi mbi normat e lejuara, 12 për drejtim mjeti nën efektin e alkoolit dhe 3 për qarkullim në sens të kundërt. Ndërkohë që një rast i veçantë ka ndodhur në qytetin e Cërrikut, ku një i ri 27-vjeçar me inicialet E. V. është arrestuar pasi ka tentuar të korruptojë policinë. Ai i ka ofruar efëktivit të policisë një kartëmonedhë 5.000 lekëshe, pasi e ka kapur duke xhiruar gomat dhe kryer manovra të rrezikshme.

Policia e Shtetit/Siguria Rrugore, një ndër prioritetet kryesore. Në të gjitha rrugët e vendit vijojnë kontrollet intensive nga Policia Rrugore, me radarë, dronë, mjete të paloguara, kamera, aparate fotografike e alkooltestues, me qëllim parandalimin e aksidenteve rrugore.

Edhe gjatë 24 orëve të fundit, gjatë kontrolleve intensive në çdo aks rrugor dhe qendra urbane, me patrulla të lëvizshme të Policisë Rrugore, me mjete të paloguara, dronë, kamera dhe aparate fotografike, janë konstatuar përsëri shumë drejtues mjetesh që abuzojnë me shpejtësinë, me alkoolin apo me përdorimin e celularit në timon, me mospërdorimin e rripit të sigurimit dhe më keq akoma me drejtimin e automjetit, pa leje drejtimi.

Si rezultat i kontrolleve, gjatë 24 orëve të fundit janë arrestuar në flagrancë 6 drejtues mjetesh dhe motomjetesh, nga të cilët 3 për drejtim mjeti pa leje drejtimi dhe 3 për drejtim mjeti në gjendje të dehur, me masë alkooli deri në 0.56 mg/l.

Janë pezulluar 34 leje drejtimi, nga të cilat 19 për shpejtësi mbi normat e lejuara, që varion nga 83 km/orë në qendrat e banuara deri në 172 km/orë në rrugën interurbane Tiranë-Durrës, 12 për drejtim mjeti nën efektin e alkoolit apo në gjendje të dehur dhe 3 për qarkullim në sens të kundërt.


Janë ndëshkuar me masë administrative, në të gjithë vendin, 1554 drejtues mjetesh, për shkelje që sjellin pasoja në jetën dhe shëndetin e përdoruesve të rrugës.

Nga Policia Rrugore e Elbasanit është arrestuar në flagrancë shtetasi E. V., 27 vjeç, banues në Cërrik, i cili pasi është konstatuar nga shërbimet e Policisë, duke xhiruar gomat dhe duke bërë manovra të rrezikshme me mjetin, i ka ofruar një kartëmonedhë me prerje 5.000 lekë punonjësit të Policisë, për të shmangur masën administrative.

Policia e Shtetit apelon për të gjithë drejtuesit e automjeteve dhe motomjeteve: Mos shpejtoni, mos kryeni parakalime të gabuara, mos drejtoni mjetin nën efektin e alkoolit apo në gjendje të dehur, mos përdorni celularin në timon, vendosni rripin e sigurimit dhe kaskën mbrojtëse, mbroni jetën tuaj dhe të përdoruesve të tjerë të rrugës, respektoni rregullat e qarkullimit që të arrini të sigurt në destinacion, mos u bëni statistikë!

Policia e Shtetit fton qytetarët që të denoncojnë në numrin 112 dhe në Komisariatin Dixhital, çdo shkelje të Kodit Rrugor, duke iu garantuar anonimat të plotë dhe reagim të shpejtë e profesional.