Plan masash për menaxhimin e trafikut, Qibini: Të fokusuar në disa nyje të qarkullimit rrugor

Ai u shpreh se në festat e fundvitit u morën një sërë masash dhe se në Tiranë nuk pati ngjarje rrugore.

Gjithashtu theksoi se për shoferët që kryejnë manovra të çuditshme është bërë edhe testi i drogës.

Sa i përket garave të shpejtësisë në akset rrugore, Qibini sqaroi se në Tiranë gara masive nuk ka, por janë gara individuale që nëpërmjet raportimeve konstatohen dhe ndëshkohen.

“Kemi angazhuar shumë patrulla policie. Në zonën e qendrës kemi angazhuar më shumë shërbime patrulla këmbësore ose me motomjet, po ashtu edhe në akse inter-urbane. Të gjitha mjetet kanë qenë me sisteme pamore gjatë orëve të mbrëmjes apo të mëngjesit. Për fat të mirë nuk kemi pasur ngjarje rrugore në këto akse. Orari i mëngjesit në kryeqytet është i ngarkuar me trafik. Kryesisht trafiku i rënduar është në Unazën e Madhe, po ashtu edhe në zonën e rrugës Sami Frashëri, në Sheshin Willson. Në të gjitha këto akse krijohet mundësia për ta lehtësuar trafikun”, tha ai.

Balluku inspekton punimet në aksin Thumanë-Kashar: Do të lehtësojë ndjeshëm trafikun

Ministrja e Infrastrukturës dhe Energjisë, njëherësh zëvendëskryeministre, Belinda Balluku inspektoi së bashku me kreun e ARRSH-së, Evis Berberi punimet në kantierin e aksit të ri rrugor Thumanë-Kashar, ku ka nisur procesi i asfaltimit. Ministrja theksoi se ecuria e punimeve ka arritur në 65 %.

Ky aks rrugor, 21 kilometra i gjatë, do të ketë 11 ura, 6 nënkalime dhe mbi 100 vepra të tjera arti. Balluku theksoi se do të lehtësojë ndjeshëm lëvizjen e automjeteve, në një prej zonave me fluksin më të dendur të qarkullimit.

“Ne themi krenarisht se kjo është një vepër e rëndësishme pasi do të zhbllokojë pjesën më të madhe të trafikut të krijuar sidomos gjatë verës, që është pjesa e Fushë-Krujës dhe nga ana tjetër, edhe lidhjen me aeroportin e Rinasit. Por ne gjithashtu ndihemi mirë për këtë projekt sepse është një autostradë e kategorisë A, me një gjerësi 11.75, e cila do të ketë dy korsi shpejtësie, një korsi tre metra emergjence, dhe ka edhe një pjesë të pankinës në anë.”, tha ministrja.

Sakaq, kreu i ARRSH-së shtoi se kjo është e para autostradë në Shqipëri, e cila do të jetë e kufizuar me gardh.

“Duke qenë një autostradë e kategorisë A, është parashikuar që brenda standardit të ndërtohet një gardh rrethues nga të dyja krahët në mënyrë të tillë që të mos lejojë aksesin e askujt për të rritur sigurinë e lëvizjes dhe për të rritur shpejtësinë e lëvizjes.”, tha Berberi.